మైనర్ గ్యాంగ్రేప్ కేసులో పుణె పోలీసులు 8 మందిని అరెస్ట్ చేశారు. వీరిలో ఈ కేసుతో సంబంధం ఉన్న ఇద్దరు రైల్వే సిబ్బంది కూడా ఉన్నట్లు అధికారులు తెలిపారు. ఆగస్టు 31న రాత్రి పుణె రైల్వే స్టేషన్ నుంచి బాలికను గుర్తు తెలియని వ్యక్తులు అపహరించారని పేర్కొన్నారు. అనంతరం ఆమెపై సామూహిక అత్యాచారానికి పాల్పడినట్టు చెప్పారు.
బాలిక తండ్రి ఫిర్యాదు ఆధారంగా పోలీసులు తొలుతగా కిడ్నాప్ కేసు నమోదు చేశారని అధికారులు తెలిపారు. అనంతరం ఈ ఘటనపై బాలిక వాంగ్మూలం తీసుకున్న తర్వాత పోలీసులు నిందితులపై సామూహిక అత్యాచారం, పోక్సో చట్టంలోని సంబంధిత సెక్షన్ల కింద కేసు నమోదు చేసినట్లు సిటీ కమిషనర్ నమ్రతా పాటిల్ వివరించారు.
ఇదీ జరిగింది..
గత నెల 31వ తేదీన ఓ బాలిక తన మిత్రుల కోసమని పూణె రైల్వే స్టేషన్కు చేరుకుంది. అక్కడ వారు లేరు. దీంతో తిరిగి ఇంటికి వచ్చే క్రమంలో ఓ ఆటో డ్రైవర్ ఇంటి దగ్గర వదిలిపెడుతానని చెప్పాడు. అతని మాటలు నమ్మిన అమ్మాయి ఆటో ఎక్కింది. అక్కడ నుంచి అతను ఓ తెలియని ప్రదేశానికి తీసుకుపోయినట్లు పోలీసులు తెలిపారు. అనంతరం ఆ బాలికను పుణె, ముంబయిలోని వివిధ ప్రదేశాల్లో అత్యాచారం చేసినట్లు పేర్కొన్నారు. ప్రస్తుతం బాధితురాలి ఆరోగ్యం నిలకడగా ఉన్నట్లు తెలిపిన అధికారులు.. అదుపులోకి తీసుకున్న 8 మంది నిందితులను కస్టడీకి తరలించినట్లు చెప్పారు.
ఇదీ చూడండి:వర్షాల కోసం బాలికలను నగ్నంగా ఊరేగించి..!
