'బీఫ్ తినండి..' అంటూ ఓ భాజపా మంత్రి చేసిన వ్యాఖ్యలు వివాదాస్పదమయ్యాయి. భాజపా సిద్ధాంతాలకు ఈ వ్యాఖ్యలు వ్యతిరేకంగా ఉండటమే కాకుండా.. ఇందుకు ఆయన ఇచ్చిన వివరణ ఇప్పుడు సర్వత్రా చర్చనీయాంశమైంది.
'చికెన్.. మటన్.. వద్దు'
మేఘాలయ కేబినెట్లో గత వారం మంత్రిగా ప్రమాణస్వీకారం చేసిన శాన్బోర్ షుల్లాయ్.. ఇది ప్రజాస్వామ్య దేశమని.. అందువల్ల ఎవరికి నచ్చింది వారు తినే స్వేచ్ఛ ఉందని తెలిపారు. అయితే చికెన్, మటన్, ఫిష్ బదులు బీఫ్ తినాలని ప్రోత్సహించారు.
"చికెన్, మటన్, ఫిష్ బదులు బీఫ్ తినాలని నేను ప్రజలకు పిలుపునిస్తున్నాను. ఇలా చేస్తే.. గో వధపై భాజపా నిషేధం విధిస్తుందన్న భావన తొలిగిపోతుంది."
-- శాన్బోర్ షుల్లాయ్, మేఘాలయ మంత్రి
పశుసంవర్ధకశాఖ మంత్రిగా విధులు నిర్వహిస్తున్నారు షుల్లాయ్. అసోంలో తీసుకొచ్చిన నూతన గో చట్టం నేపథ్యంలో మేఘాలయకు పశు రవాణా దెబ్బతినకుండా ఉండేందుకు ఆ రాష్ట్ర ముఖ్యమంత్రి హిమంత బిశ్వ శర్మతో చర్చిస్తానని హామీనిచ్చారు.
ఈ క్రమంలో అసోం- మేఘాలయ సరిహద్దు వివాదంపైనా స్పందించారు షుల్లాయ్. అసోం వాసులు తమ ప్రజలను హింసిస్తే.. ఇక అక్కడిక్కడే సమాధానం ఇవ్వాల్సిన సమయం వచ్చిందన్నారు. అయితే తాను హింసను ప్రొత్సహించడం లేదని స్పష్టం చేశారు.
ఇదీ చూడండి: 'బీఫ్ తినొద్దని చెప్పడానికి మీరెవరు ?'
