Drugs seized in Bangalore: అంతర్జాతీయ డ్రగ్స్ ముఠాకు చెందిన ఆఫ్రికా వ్యక్తిని బెంగళూరులో అరెస్ట్ చేశారు మాదకద్రవ్యాల నియంత్రణ విభాగం(ఎన్సీబీ) అధికారులు. రూ.1.5 కోట్లు విలువైన సింథటిక్ డ్రగ్స్ను స్వాధీనం చేసుకున్నారు.
చెన్నై, బెంగళూరు జోనల్ ఎన్సీబీల నుంచి వచ్చిన సమాచారం మేరకు బెంజమిన్ సండే అలియాస్ ఆంటోనీ అనే వ్యక్తిని గత గురువారం పట్టుకున్నట్లు ఎన్సీబీ బెంగళూరు జోనల్ డైరెక్టర్ అమిత్ గవాటే శుక్రవారం తెలిపారు. నిందితుడి వద్ద 968 గ్రాముల అంఫెటమిన్, 2.889 కిలోల ఎఫెడ్రిన్ స్వాధీనం చేసుకున్నట్లు చెప్పారు. కొరియర్ ద్వారా విదేశాలకు తరలించేందుకు ముంబయి నుంచి ఈ మత్తు పదార్థాలను తీసుకొచ్చినట్లు వెల్లడించారు.
" మూడు చెక్క బాక్సుల్లో ప్రత్యేకంగా రూపొందించిన బొరియల్లో ఈ మత్తుపదార్థాలను దాచారు. ఒక్కో బాక్సులో 165 గ్రాముల అంఫేటమిన్, వాహనం సీటు వెనకాల రెండు చోట్ల 237 గ్రాములు, 236 గ్రాముల అంఫేటమిన్, రెండు మెటల్ గిరకల్లో 1.811 కిలోలు, 1.078 కిలోల ఎఫెడ్రిన్లను దాచారు. అంతర్జాతీయ మార్కెట్లో వాటి విలువ రూ. 1.5 కోట్లు ఉంటుంది. "
- అమిత్ గవాటే, బెంగళూరు ఎన్సీబీ జోనల్ డైరెక్టర్
బెంజమిన్ చెన్నైకి చెందిన మహిళను వివాహం చేసుకున్నాడని, మత్తుపదార్థాల దిగుమతి, ఎగుమతిలో కీలకంగా వ్యవహరిస్తున్నట్లు చెప్పారు డైరెక్టర్. చెన్నైలో 2018, సెప్టెంబర్లో పట్టుబడిన 113 గ్రాముల కొకైన్, 2021, సెప్టెంబర్లో దొరికిన 295 గ్రాముల మెతంఫెటమిన్ కేసుల్లో బెంజమిన్ కోసం వెతుకుతున్నట్లు తెలిపారు. 2021, నవంబర్లో ఆస్ట్రేలియాలో పట్టుబడిన 1359 గ్రాముల మెతంఫెటమిన్ కేసులోనూ నిందితుడిగా చెప్పారు.
ఇదీ చూడండి: డీఐజీ భార్య పర్సు చోరీ.. బస్సులో ప్రయాణిస్తుండగా..
