భారత్లో.. రష్యా కరోనా టీకా స్పుత్నిక్-వీ 2,3 దశల క్లీనికల్ ట్రయల్స్ ప్రారంభమయ్యాయి. సెంట్రల్ డ్రగ్స్ ల్యాబొరేటరీ నుంచి కావాల్సిన అనుమతులు పొందిన నేపథ్యంలో హిమాచల్ ప్రదేశ్లోని కాసౌలిలో ఈ ట్రయల్స్ చేపట్టినట్టు డా. రెడ్డీస్ ల్యాబొరేటరీ, ఆర్డీఐఎఫ్(రష్యా ప్రత్యక్ష పెట్టుబడుల నిధి) ఓ ప్రకటనలో వెల్లడించాయి.
జేఎస్ఎస్ మెడికల్ రీసర్చ్ సభ్యులు ఈ క్లినికల్ ట్రయల్స్ను నిర్వహిస్తున్నారు. టీకా భద్రత సహా ఇతర ముఖ్య అంశాలపై ఇక్కడ అధ్యయనం జరుగుతుందని డా. రెడ్డీస్ వెల్లడించింది.
మరోవైపు కీలక సూచనలు, క్లినికల్ ట్రయల్స్ కేంద్రాల కోసం బయోటెక్నాలజీ విభాగానికి చెందిన బీఐఆర్ఏసీ(బయోటెక్నాలజీ ఇండస్ట్రి రీసర్చ్ అసిస్టెన్స్ కౌన్సిల్)ను భాగస్వామిగా చేర్చుకున్నట్టు డా. రెడ్డీస్ ప్రకటించింది.
ఇటీవలే ప్రకటించిన టీకా ఫలితాల్లో.. తొలి డోసు ఇచ్చిన 28 రోజులకు తమ వ్యాక్సిన్ 91.4శాతం ప్రభావవంతంగా పనిచేస్తోందని ఆర్డీఐఎఫ్ తెలిపింది. అదే 42 రోజుల తర్వాత.. 95శాతం ప్రభావవంతంగా ఉందని పేర్కొంది.
ఇదీ చూడండి:- భారత్లో 10 కోట్ల స్పుత్నిక్-వీ టీకాల ఉత్పత్తి
