Dalit Man Face Smeared With Human Excreta : పొరపాటున గ్రీజు అంటించడం వల్ల.. మరో కులానికి చెందిన వ్యక్తి తన ముఖం, శరీరంపై మలం పూశాడని ఓ దళిత వ్యక్తి సంచలన ఆరోపణ చేశాడు. బాధితుడి ఫిర్యాదు మేరకు నిందితుడిని శనివారం అదుపులోకి తీసుకున్నట్లు పోలీసులు తెలిపారు. ఈ ఘటన మధ్యప్రదేశ్ ఛతర్పుర్ జిల్లాలోని బికౌరా గ్రామంలో జరిగింది.
ఇదీ జరిగింది..
ఛతర్పుర్ జిల్లా కేంద్రానికి 35 కిలోమీటర్ల దూరంలో ఉన్న బికౌర గ్రామంలో డ్రైనేజీ నిర్మించే పనికి దశరథ్ అహిర్వార్ అనే దళిత వ్యక్తి వెళ్లాడు. ఆ డ్రైనేజీ సమీపంలో ఉన్న చేతి పంపు వద్ద రాంకృపాల్ పటేల్ అనే వ్యక్తి స్నానం చేస్తున్నాడు. అహిర్వార్ చేతికి ఉన్న గ్రీజు రాంకృపాల్కు అంటింది. దీంతో కోపోద్రిక్తుడైన నిందితుడు రాంకృపాల్.. తాను స్నానం చేస్తున్న మగ్గుతో.. సమీపంలో ఉన్న మలాన్ని తీసుకువచ్చి.. దశరథ్ అహిర్వార్ తల, ముఖం, శరీరంపై పూశాడు. అక్కడితో ఆగకుండా.. కులం పేరుతో దూషించాడు. ఈ విషయాన్ని గ్రామ పంచాయితీ దృష్టికి తీసుకెళ్తే.. తిరిగి బాధితుడిపైనే రూ. 600 జరిమానా విధించారు. ఈ మేరకు బాధితుడు తన ఫిర్యాదులో పేర్కొన్నట్లు పోలీసులు తెలిపారు.
ఈ ఘటనపై స్పందించిన ఎస్డీఓపీ మన్మోహన్ సింగ్ భగేల్.. నిందితుడిపై ఎస్సీ/ ఎస్టీ చట్టంతో పాటు పలు ఐపీసీ సెక్షన్ల కింద కేసు నమోదు చేశామని తెలిపారు. అయితే, రాంకృపాల్, దశరథ్.. ఇద్దరు ఒకరిపై ఒకరు సరదాగా వస్తువులు విసిరేసుకున్నారని.. తర్వాత అహిర్వార్ గ్రీజు రాంకృపాల్కు పూశాడని చెప్పారు. అనంతరం చేత్తో మలాన్ని తీసి.. అహిర్వార్పై పూశాడని తెలిపారు. అహిర్వార్ శనివారం ఫిర్యాదు చేసినట్లు వెల్లడించారు. అయితే, పంచాయితీకి ఫిర్యాదు చేసిన విషయంలో అహిర్వార్ను ఆరా తీయగా.. సమాధానం చెప్పలేదన్నారు. ఇద్దరు వ్యక్తుల వయసు 40 నుంచి 45 మధ్య ఉంటుందని తెలిపారు.
గిరిజనుడిపై మూత్ర విసర్జన..
మధ్యప్రదేశ్లోని సీధీ జిల్లాలో దాదాపు 3 నెలల క్రితం ఆదివాసీ యువకుడు దశరథ్ రావత్పై ప్రవేశ్ శుక్లా అనే వ్యక్తి మూత్రం పోయగా.. ఆలస్యంగా ఈ ఘటన వెలుగులోకి వచ్చింది. ఈ వీడియో ఇటీవల వైరల్‌ కావడం వల్ల మధ్యప్రదేశ్‌లో రాజకీయ ప్రకంపనలు సృష్టించింది. దీంతో ప్రవేశ్ శుక్లాను అరెస్టు చేసి.. జాతీయ భద్రతా చట్టం కింద కేసు నమోదు చేశారు పోలీసులు. అతడి ఇంటిని కూడా బుల్డోజర్‌తో నేలమట్టం చేశారు. ఈ ఘటనపై మధ్యప్రదేశ్ ముఖ్యమంత్రి శివరాజ్ సింగ్ విచారం వ్యక్తం చేశారు. రాజధాని భోపాల్లోని తన నివాసానికి బాధితుడ్ని పిలిపించుకుని కాళ్లు కడిగి క్షమాపణ కోరారు. బాధితుడు దశరథ్ రావత్ను కుర్చీపై కూర్చోబెట్టి, తాను కిందే కూర్చోని.. నీళ్లతో అతడి కాళ్లు కడిగారు. దశరథ్ రావత్ను సన్మానించి, స్నేహితుడిగా సంభోదిస్తూ.. సరదాగా కాసేపు ముచ్చటించారు. ఈ వీడియో చూడాలంటే ఈ లింక్పై క్లిక్ చేయండి.
