అరేబియా సముద్రంలో ఏర్పడిన తౌక్టే తుపాన్‌.. అతి తీవ్ర తుపాన్‌గా మారింది. ముంబయికి 150 కి.మీ. దూరంలో కేంద్రీకృతమైన తుపాను.. పశ్చిమ వాయవ్య దిశగా గంటకు 20 కి.మీ. వేగంతో పయనిస్తోంది. సాయంత్రం 5.30- 8.30 గంటల మధ్య గుజరాత్ తీరాన్ని తాకి.. రాత్రి 8-11 గంటల సమయంలో పోరుబందర్- మహువా మధ్యలో తీవ్రత తగ్గి తీరం దాటనుంది.
తుపాను ప్రభావంతో తీర ప్రాంతాల్లో భారీ వర్షాలు, ఈదురు గాలులు వీస్తున్నాయి.
రెండు నౌకల్లో 410 మంది..
ముంబయి పశ్చిమ తీరాన ఉన్న చమురు కేంద్రాల్లోని రెండు వ్యాపారనౌకలు కొట్టుకుపోయాయి.
- పీ305 అనే నౌకలో 273 మంది సిబ్బంది ఉన్నట్లు సమాచారం. దీని కోసం.. ఐఎన్ఎస్ కొచ్చి యుద్ధనౌకతో గాలింపు చర్యలు చేపట్టింది నౌకా దళం.
- జీఏఎల్ కన్స్ట్రక్టర్ అనే మరో నౌక కూడా కొట్టుకుపోయినట్లు సమాచారం అందింది. దీంట్లో 137 మంది ఉన్నారు. ఇక్కడ ఐఎన్ఎస్ కోల్కతా యుద్ధనౌక రంగంలోకి దిగింది.
- తౌక్టే కారణంగా రాయ్గఢ్ జిల్లాలో రెడ్ అలర్ట్, ముంబయిలో ఆరెంజ్ అలర్ట్ జారీ చేసింది వాతావరణ శాఖ. ఇక్కడ భారీ వర్షాలు, భీకర గాలులు హడలెత్తిస్తున్నాయి.
- కొంకణ్ ఆనంద్ వాడీ ఓడరేవు వద్ద పడవ మునగగా.. ఒక నావికుడు చనిపోయాడు. మరో ముగ్గురి ఆచూకీ తెలియలేదు.
- వర్షాలు కారణంగా మరొకరు ప్రాణాలు కోల్పోయారు.
మహా సీఎంకు మోదీ ఫోన్..
తౌక్టే తుపాను సన్నద్ధతపై.. మహారాష్ట్ర ముఖ్యమంత్రి ఉద్ధవ్ ఠాక్రేతో ఫోన్లో మాట్లాడారు ప్రధాన మంత్రి నరేంద్ర మోదీ. రాష్ట్రంలో పరిస్థితుల గురించి అడిగి తెలుసుకున్నారు.
- కేరళలో సముద్రం అల్లకల్లోలంగా మారి.. కెరటాలు ఎగసిపడుతున్నాయి. 9 జిల్లాల్లో తుపాను తీవ్రత అధికంగా ఉంది. పలు ప్రాంతాల్లో ఇళ్లు ధ్వంసమయ్యాయి.
- కర్ణాటకలో పలు చోట్ల భారీ వర్షం కురిసింది. పలు ప్రాంతాల్లో విద్యుత్ వ్యవస్థకు తీవ్ర అంతరాయం కలిగింది. 121 గ్రామాలు తీవ్రంగా ప్రభావితమయ్యాయి. ఇక్కడి తీర ప్రాంతాల్లో మొత్తం ఆరుగురు ప్రాణాలు కోల్పోయారు. రాష్ట్రంలో మొత్తం 300కుపైగా ఇళ్లు ధ్వంసమయ్యాయి.
ఇదీ చూడండి: మరుగుజ్జు వెదురుతో సామాన్యుడి లాభాల పంట
