పిల్లలకు కొవిడ్ వ్యాక్సినేషన్పై నిర్ణయం తీసుకోవడానికి మరింత సమాచారం అవసరమని ఐసీఎంఆర్ డైరెక్టర్ బలరాం భార్గవ శుక్రవారం పేర్కొన్నారు. గర్భిణులకు మాత్రం టీకాలు వేయొచ్చని స్పష్టం చేశారు. ఇందుకుగానూ కేంద్ర, వైద్య ఆరోగ్య మంత్రిత్వ శాఖ మార్గదర్శకాలు విడుదల చేసినట్లు చెప్పారు.
పసిపిల్లలకు మాత్రం టీకా వేయాలా? వద్దా? అనే అంశం ప్రశ్నార్థకంగానే ఉన్నట్లు పేర్కొన్నారు.
'' ప్రస్తుతం అమెరికా మాత్రమే పిల్లలకు టీకాలు వేస్తోంది. అక్కడ కూడా కొన్ని సంక్లిష్టతలు కనిపించాయి. కాగా.. పసిపిల్లలకు టీకా అవసరమవుతుందా అన్నది ఇప్పటికీ ప్రశ్నార్థకంగానే ఉంది. 2-18 ఏళ్ల వయసువారికి టీకాలు వేసే విషయమై అధ్యయనాన్ని ప్రారంభించాం. ఆ ఫలితాలు సెప్టెంబర్-అక్టోబర్ కల్లా వచ్చే అవకాశముంది. ఆ తర్వాత నిర్ణయం తీసుకోవచ్చు.''
- డా. బలరాం భార్గవ, ఐసీఎంఆర్ డైరెక్టర్ జనరల్.
పిల్లలకు టీకాలు వేసే అంశంపై అంతర్జాతీయంగా వైద్య నిపుణులు.. ఇంకా ప్రయోగాలు జరుపుతున్నారని తెలిపారు ఐసీఎంఆర్ చీఫ్.
ఇదీ చదవండి: Covaxin: సెప్టెంబర్ నుంచి పిల్లలకు కొవాగ్జిన్..!
కసరత్తు ముమ్మరం..
మరోవైపు.. కొవిడ్ థర్డ్ వేవ్ పిల్లలపై ఎక్కువ ప్రభావం చూపుతుందనే ఊహాగానాలు, హెచ్చరికల నేపథ్యంలో పిల్లలకు వ్యాక్సిన్ ఇచ్చేందుకు కేంద్రం, వ్యాక్సిన్ కంపెనీలు కసరత్తును వేగవంతం చేశాయి. భారత్ బయోటెక్కు చెందిన కొవాగ్జిన్.. పిల్లలపై ఇప్పటికే వ్యాక్సిన్ ట్రయల్స్ను ప్రారంభించగా వాటి ఫలితాలు ఈ ఏడాది సెప్టెంబర్ లోపు వెలువడే అవకాశాలున్నాయి.
కొవాగ్జిన్తో పాటు.. ఫైజర్, జైడస్ క్యాడిలా వ్యాక్సిన్లను సైతం పిల్లలకు వేసేందుకు అందుబాటులోకి తీసుకువచ్చేలా కేంద్రం ప్రయత్నాలను వేగవంతం చేసింది.
కొవావ్యాక్స్ ఉత్పత్తి షురూ..
అమెరికా సంస్థ నొవావ్యాక్స్ అభివృద్ధి చేసిన 'కొవావ్యాక్స్' టీకా ఉత్పత్తిని భారత్లో ప్రారంభించినట్లు సీరం సంస్థ పేర్కొంది. ఈ విషయంపై హర్షం వ్యక్తం చేశారు సంస్థ సీఈఓ అదర్ పూనావాలా. 18 ఏళ్ల లోపు వారికి కూడా ఈ టీకా బాగా ఉపయోగపడుతుందని వెల్లడించారు. ఈ జులైలో.. భారత్లో చిన్నపిల్లలపై క్లినికల్ ట్రయల్స్ జరగనున్నట్లు తెలుస్తోంది.
ఇదీ చదవండి: Vaccine for children: చిన్న పిల్లలకు టీకా ఎప్పుడు? ఎలా?
