'మోదీజీ.. చైనాకు ఇచ్చిన క్లీన్​చిట్​ను వెనక్కి తీసుకోండి'

ప్రధాని మోదీ ప్రభుత్వంపై కాంగ్రెస్​ మండిపడింది. సరిహద్దుల్లో చైనా చొరబడలేదని మోదీ క్లీన్​ ఇచ్చారని.. కానీ అరుణాచల్​ప్రదేశ్​లో ఏకంగా గ్రామాన్నే నిర్మించిందని అమెరికా నివేదిక బయటపెట్టిందని పేర్కొంది. ఈ విషయంలో క్లీన్​ చిట్​ను మోదీ వెనక్కి తీసుకుని, ప్రజలకు క్షమాపణలు చెప్పాలని డిమాండ్​ చేసింది.

అరుణాచల్​ప్రదేశ్​లో చైనా గ్రామాన్ని నిర్మించిందని అమెరికా పెంటగాన్​ వెలువరించిన నివేదికపై దేశంలో దుమారం రేగింది. తాజాగా.. ఈ వ్యవహారంపై స్పందిస్తూ ప్రధానమంత్రి నరేంద్ర మోదీ ప్రభుత్వంపై మండిపడింది కాంగ్రెస్​. దేశ సరిహద్దుల్లోకి ఎవరూ ప్రవేశించలేదని చెబుతూ.. చైనాకు మోదీ క్లీన్​ చిట్​ ఇచ్చారని, దానిని ప్రధాని వెనక్కి తీసుకోవాలని డిమాండ్​ చేసింది. ప్రజలకు మోదీ క్షమాపణలు చెప్పాలని పేర్కొంది.

"అరుణాచల్​ప్రదేశ్​లో చైనా గ్రామాన్ని నిర్మించిందని అమెరికా పెంటగాన్​ తన వార్షిక నివేదికలో చెప్పింది. సరిహద్దులో నిర్మించిన గ్రామాన్ని పౌరుల కోసమే కాకుండా ఆర్మీ కోసం కూడా చైనా వినియోగిస్తోందని తేల్చింది. దీనిపై ప్రధాని సమాధానం చెప్పాలి. అరుణాచల్​ప్రదేశ్​లో చైనా చొరబడిందని భాజపా ఎంపీ తపిర్​ గావో స్వయంగా ప్రధానికి లేఖ రాశారు. కానీ అలా ఏం జరగలేదంటూ మోదీ, అమిత్​షా చైనాకు క్లీన్​ చిట్​ ఇచ్చారు. ఇది దేశ చరిత్రలోనే ఓ చీకటి అధ్యయనం. దీనిని అదునుగా చేసుకుని లద్ధాఖ్​, ఉత్తరాఖండ్​లోనూ చైనా పీఎల్​ఏ సైనికులు చొరబడ్డారు. ఇది చాలా తీవ్రమైన సమస్య. ఆ క్లీన్​చిట్​ను మోదీ ఉపసంహరించుకోవాలి. సరిహద్దు వెంబడి 2020ఏప్రిల్​ నాటి యథాతథ స్థితిని తిరిగి ఎప్పుడు పునరుద్ధరిస్తారనే విషయంపై మోదీ డెడ్​లైన్​ ప్రకటించాలి. మాకు సమాధానాలు కావాలి. మాకు డెడ్​లైన్స్​ కావాలి. దేశ సరిహద్దుల్లోకి చైనా చొరబడలేదని ప్రపంచానికి అబద్ధం చెప్పిన ఈ ప్రభుత్వం మాకు క్షమాపణలు చెప్పాలి."

--- పవన్​ ఖేరా, కాంగ్రెస్​ ప్రతినిధి.

'ఆ పన్నులు కూడా ఉపసంహరించుకోవాలి..'

పెట్రోల్​, డీజిల్​పై గతేడాది కాలంలో విధించిన పన్నులను మోదీ సర్కారు ఉపసంహరించుకోవాలని డిమాండ్​ చేసింది కాంగ్రెస్​.

"కొవిడ్​ పేరుతో పెట్రోల్​పై రూ. 13, డీజిల్​పై రూ 16 (లీటరుకు) పెంచింది కేంద్రం. ఇవన్నీ పన్నుల రూపంలోనే వసూలు చేసింది. జీఎస్​టీ వసూళ్లు రికార్డు స్థాయిలో ఉన్నందన.. గతేడాది కాలంలో పెంచిన రేట్లను వెంటనే ప్రభుత్వం ఉపసంహరించుకోవాలి. పన్నులను తగ్గించే అంశంపై కాంగ్రెస్​ పాలిత ప్రాంతాలు చర్చిస్తున్నాయి. త్వరలో ఓ నిర్ణయం తీసుకుంటాయి."

-- పవన్​ ఖేరా, కాంగ్రెస్​ ప్రతినిధి.

కొవిడ్​ కాలంలో పేదలకు ఉచితంగా అందిస్తున్న రేషన్​ను నిలిపివేయకూడదని విజ్ఞప్తి చేసింది కాంగ్రెస్​. కొవిడ్​ అనంతరం కాలంలో ఆర్థికవ్యవస్థ పుంజుకోవడం వల్ల ఉచిత రేషన్​ను కొనసాగించే ప్రతిపాదనేది తమ వద్ద లేదని కేంద్రం ఆహార, ప్రజా పంపిణీ శాఖ చేసిన ప్రకటన నేపథ్యంలో కాంగ్రెస్​ ఈ వ్యాఖ్యలు చేసింది.

ఇదీ చూడండి:- తాగి వేరే ఇంటికి వెళ్లిన మాజీ ఎంపీ.. చితకబాదిన యజమాని!