సెంట్రల్ విస్టా ప్రాజెక్టులో(Central Vista project) భాగంగా రాజ్పథ్(Rajpath) పునర్నిర్మాణ పనులు ఈ ఏడాది నవంబర్ నాటికి పూర్తవుతాయని అధికారులు తెలిపారు. వచ్చే ఏడాది గణతంత్ర దినోత్సవ పరేడ్(Republic Day parade) సరికొత్త రాజ్పథ్లోనే జరుగుతుందని ఆశాభావం వ్యక్తం చేశారు.
సెంట్రల్ విస్టా ప్రాజెక్ట్లో భాగంగా చేపడుతోన్న నిర్మాణ పనులపై శుక్రవారం.. సమీక్షించారు కేంద్ర గృహ, పట్టణ వ్యవహారాల శాఖ మంత్రి హర్దీప్ సింగ్ పూరీ. దేశ ప్రజలు గర్వించదగిన నిర్మాణాలను పొందుతారని తెలిపారు.
" సెంట్రల్ విస్టా ప్రాజెక్ట్లో జరుగుతోన్న నిర్మాణ పనులను గృహ, పట్టణ వ్యవహారాల శాఖ సెక్రటరీ, అధికారులు, సీపీడబ్ల్యూడీ, కాంట్రాక్టర్, ఆర్కిటెక్ట్ బిమాల్ పటేల్తో కలిసి సమీక్షించాం. నిర్మాణాల పురోగతి సంతృప్తికరంగా, సమయానుగుణంగా సాగుతోంది. పౌరులు గర్వించదగిన భవనాలను పొందుతారు."
- హర్దీప్ సింగ్ పూరీ, కేంద్ర మంత్రి
రాజ్పథ్ పునర్నిర్మాణ ప్రాజెక్టులో భాగంగా.. పెద్ద ఎత్తున రాతి పనులు, అండర్పాస్ నిర్మాణాలు, భూగర్భ సౌకర్యాలు, ఉద్యానవనాలు, పార్కింగ్కు కావాల్సిన స్థలం పనులు జరుగుతున్నాయని అధికారులు తెలిపారు. కృత్రిమ సరస్సులపై 12 వంతెనల నిర్మాణం చేపడుతున్నామని, దీని ద్వారా రాజ్పథ్ను సందర్శించే వారికి గొప్ప అనుభూతి లభిస్తుందన్నారు. కొత్తగా అభివృద్ధి చేసిన రాజ్పథ్లోనే రిపబ్లిక్ డే పరేడ్ జరుగుతుందని తెలిపారు.
ప్రభుత్వం ప్రతిష్టాత్మకంగా చేపట్టిన సెంట్రల్ విస్టా ఆధునికీకరణ ప్రాజెక్టులో భాగంగా రాజ్పథ్ పునర్నిర్మాణ పనులు చేపడుతోంది ఇన్ఫ్రాస్ట్రక్చర్ సంస్థ షాపుర్జీ పల్లోంజి అండ్ కంపెనీ. సెంట్రల్ విస్టాలో కొత్త త్రిభుజాకార పార్లమెంట్ భవనం, ఉమ్మడి కేంద్ర సచివాలయం, మూడు కిలోమీటర్ల మేర పునరుద్ధరించిన రాజ్పత్(రాష్ట్రపతి భవన్ నుంచి ఇండియా గేట్ వరకు), కొత్త ప్రధాని నివాసం, పీఎంఓ భవనం, కొత్త ఉపరాష్ట్రపతి ఎన్క్లేవ్లు ఉన్నాయి.
ఇదీ చూడండి: 'రాజ్పథ్' పునర్నిర్మాణ పనులకు భూమిపూజ
