దేశంలో కరోనా వ్యాక్సిన్‌(Corona vaccine) తీసుకున్న తర్వాత వైరస్ బారినపడుతున్న (Breakthrough Infections) కేసుల సంఖ్య ఆందోళనకర స్థాయిలో పెరుగుతోంది. ఇందులో ఎక్కువ శాతం కేసులు.. ప్రపంచ దేశాలను వణికిస్తున్న డెల్టా వేరియంట్(delta variant in india)కు చెందినవేనని ప్రభుత్వ ఆధ్వర్యంలోని జీనోమ్ సీక్వెన్సింగ్ ల్యాబొరేటరీల కన్సార్టియం(ఐఎన్ఎస్ఏసీఓజీ-ఇన్సాకాగ్) వెల్లడించింది.
భారత్లో కొవిడ్ కేసులు తగ్గకపోవడానికి, వైరస్ వ్యాప్తిలో టీకాల సామర్థ్యం అనుకున్న మేర లేకపోవడానికి గల కారణం కూడా డెల్టా వేరియెంటేనని స్పష్టం చేసింది ఇన్సాకాగ్. అయితే వ్యాధి తీవ్రత, మరణ ముప్పును తగ్గించడంలో మాత్రం టీకాలు మంచి ఫలితాల్ని ఇస్తున్నట్టు తేల్చి చెప్పింది. వైరస్ కట్టడికి ప్రజారోగ్య చర్యలు ముమ్మరం చేయడం అత్యంత కీలకమని పేర్కొంది.
ఆందోళనకర రీతిలో ఉన్న వేరియంట్లకు సంబంధించి 30,230 నమూనాలను పరీక్షించింగా.. వాటిల్లో 20,324 డెల్టా(delta variant cases in india)కు చెందినవేనని తేలినట్టు ఇన్సాకాగ్ పేర్కొంది.
"బ్రేక్త్రూ కేసులకు ఏదైనా కొత్త వేరియంట్ కారణమా? అన్న అనుమానాలు వ్యక్తమవుతున్నాయి. ప్రస్తుతానికి, దేశంలోని బ్రేక్త్రూ కేసుల సీక్వెన్సింగ్లో డెల్టా కేసులే ఎక్కువ వెలుగులోకి వస్తున్నాయి. కొత్త వేరియంట్లు ఏవైనా ఉంటే, వాటిని కనుగొనేందుకు పరిశోధనలు జరుగుతున్నాయి."
--ఇన్సాకాగ్
ఈ ఏడాది మార్చి- మే మధ్యలో దేశంలో అల్లకల్లోలం సృష్టించిన కొవిడ్ రెండో దశకు కారణంగా కూడా డెల్టా వేరియంటే. లక్షలాది మంది కరోనా బారినపడగా.. వేలాది మంది మరణించారు.
మహారాష్ట్రలో జులై నెలలో సేకరించిన కొత్త కేసుల నమూనాల్లో ఏవై.1, ఏవై.2, ఏవై.3(డెల్టా ప్లస్) వేరియంట్లు 1శాతం ఉన్నాయి. ప్రస్తుతానికి డెల్టా కన్నా ఇవి ప్రమాదకరంగా లేవని స్పష్టం చేసింది ఇన్సాకాగ్.
భారత్లోనే కాకుండా.. బ్రిటన్లోనూ బ్రేక్త్రూ కేసులు బయటపడుతున్నాయి. 6.7కోట్లకుపైగా జనాభా గల బ్రిటన్లో ఏప్రిల్ 2021 నుంచి 1.2లక్షల బ్రేక్త్రూ కేసులు వెలుగుచూశాయి. అందువల్ల డెల్టా ముప్పు తగ్గేంతవరకు ఈ బ్రేక్త్రూ కేసుల సమస్య ఉంటుందని తేల్చేసింది ఇన్సాకాగ్.
ఇదీ చూడండి:- టీకా తీసుకున్నా మళ్లీ కరోనా.. ఎందుకిలా?
