స్నేహితులతో కాసిన ఓ పందెం 25 ఏళ్ల యువకుడి నిండు ప్రాణాలను తీసింది. 'మోమోస్' ఛాలెంజ్లో భాగంగా ఏకంగా 150 మోమోస్ను తిన్నాడు బిహార్కు చెందిన ఓ యువకుడు. దీంతో ఆరోగ్యం క్షీణించడం వల్ల అతడు ప్రాణాలు విడిచాడు. సమాచారం అందుకున్న పోలీసులు మృతదేహాన్ని అనుమానస్పదస్థితిలో గోపాల్గంజ్, సివాన్ జిల్లాల సరిహద్దుల్లోని రోడ్డు పక్కన స్వాధీనం చేసుకున్నారు. అనంతరం మృతదేహానికి పోస్ట్మార్టం పరీక్షలు నిర్వహించి కుటుంబ సభ్యులకు అప్పగించారు.
పోలీసులు తెలిపిన వివరాల ప్రకారం..
మృతుడు విపిన్ కుమార్(25)ను బిహార్ తూర్పు చంపారన్ జిల్లాలోని సిహోర్వా గ్రామానికి చెందిన యువకుడిగా గుర్తించారు పోలీసులు. విపిన్ కుమార్ సివాన్ జిల్లాలోని గ్యానీ మోర్ సమీపంలో ఓ మొబైల్ రిపేర్ షాప్ను నిర్వహిస్తున్నాడు. ఈ క్రమంలో ఇద్దరు గుర్తుతెలియని యువకులు షాపులో ఉన్న విపిన్ను పిలుచుకొని బయటకు తీసుకెళ్లారని.. ఎంతకీ అతడు తిరిగి రాలేదని మృతుడి తండ్రి చెప్పినట్లుగా పోలీసులు తెలిపారు. మరోవైపు విపిన్ కుమార్ను తన స్నేహితులు కావాలనే విషం పెట్టి చంపారని అతడి తండ్రి విష్ణు మాంఝీ ఆరోపిస్తున్నారు. అయితే ఈ ఘటనపై కేసు నమోదు చేసుకున్న పోలీసులు పోస్ట్మార్టం రిపోర్ట్ వచ్చాకే విపిన్ మరణానికి గల కారణాలు తెలుస్తాయని వెల్లడించారు.
"కొందరు స్థానికులు రోడ్డుపై పడి ఉన్న తన కుమారుడి మృతదేహాన్ని గమనించి మాకు సమాచారం ఇచ్చారు. వెంటనే మేము ఘటనాస్థలికి చేరుకొని బధారియా పోలీసులకు సమాచారం అందించాం. కానీ, వారు ఈ కేసు తమ పోలీస్ స్టేషన్ పరిధిలోకి రాదని.. థావే పోలీస్ స్టేషన్ పరిధిలోకి వస్తుందని చెప్పడం వల్ల మేము సంబంధిత పోలీసులకు సమాచారం ఇచ్చాం. దీంతో వారు మృతదేహాన్ని స్వాధీనం చేసుకొని పోస్ట్మార్టం పరీక్షలు నిర్వహించి మాకు అప్పగించారు." అని విపిన్ కుమార్ తండ్రి విష్ణు మాంఝీ తెలిపారు.
"సివాన్ జిల్లా బధారియా పోలీస్ స్టేషన్ పరిధిలోని గియాని మోర్‌లో విపిన్ కుమార్ తన స్నేహితులతో కలిసి మోమోస్ తినే పందెం కాశాడు. ఈ క్రమంలో అతడి ఫ్రెండ్స్ మోమోస్ తినమని అతడిని కోరారు. దీంతో అతడు 150 వరకు మోమోస్ తిని తీవ్ర అస్వస్థతకు గురయ్యాడు. దీంతో అతడు అక్కడే ప్రాణాలు విడిచాడు. అంత పెద్ద మొత్తంలో ఒకేసారి మోమోస్ తినడం వల్లే విపిన్ ఆరోగ్యం క్షీణించి మరణించాడని భావిస్తున్నాం. అయితే పోస్ట్మార్టం నివేదిక వచ్చిన తర్వాతే మరణానికి గల కారణాలు తెలుస్తాయి."
- శశిరంజన్, థావే పోలీసు స్టేషన్ చీఫ్
