ఆ విద్యార్థుల ఖాతాల్లో రూ.వందల కోట్లు.. ఎలా వచ్చాయ్​?

గ్రామీణ ప్రాంతంలోని పాఠశాలకు వెళ్లే విద్యార్థుల బ్యాంకు ఖాతాల్లో నగదు ఎంత ఉంటుంది. మహా అయితే.. వెయ్యి, రెండు వేలు అంతే. అయితే.. ఇద్దరు విద్యార్థుల ఖాతాల్లో ఏకంగా రూ.900 కోట్లకుపైగా జమయ్యాయి(money in bank account by mistake). ఈ సంఘటన బిహార్​ కటిహార్​ జిల్లాలో జరిగింది. ఇంతకి అవి ఎలా వచ్చాయ్?

ఓ వ్యక్తి బ్యాంకు ఖాతాలో పొరపాటున(money in bank account by mistake) రూ.5.5 లక్షలు డిపాజిట్​ కాగా.. తనకు ప్రధాని నరేంద్ర మోదీ ఇచ్చారని, ఖర్చు చేసినట్లు చెప్పిన సంఘటన జరిగిన రోజుల వ్యవధిలోనే.. అలాంటిదే మరొకటి వెలుగులోకి వచ్చింది. కానీ, ఈసారి ఏకంగా రూ.900 కోట్లు. ఇద్దరు పాఠశాల విద్యార్థుల ఖాతాల్లో జమయ్యాయి. అదీ బిహార్​లోనే జరగటం గమనార్హం.

విద్యార్థుల ఖాతాల్లో కోట్లలో నగదు డిపాజిట్​ కావటంపై వారి కుటుంబ సభ్యులే కాదు, మొత్తం గ్రామస్థులంతా ఆశ్చర్యానికి లోనయ్యారు. ఎక్కడి నుంచి వచ్చాయనే విషయంపైనే ఆ ప్రాంతంలో చర్చ జరుగుతోంది.

ఇదీ జరిగింది..!

కటిహార్​ జిల్లా బగౌరా పంచాయతీ పరిధిలోని పస్తియా గ్రామానికి చెందిన విద్యార్థులు.. గురుచంద్ర విశ్వాస్​, అసిత్​ కుమార్​లకు ఉత్తర్​ బిహార్​ గ్రామిణ్​​ బ్యాంకులో ఖాతాలు ఉన్నాయి. పాఠశాల యూనిఫామ్స్​ కోసం రాష్ట్ర ప్రభుత్వం ఇచ్చే నగదు తమ ఖాతాలో జమ అయ్యిందో లేదో అని తెలుసుకోవాలనుకున్నారు. సమీపంలోని స్టేట్​ బ్యాంక్​ ఆఫ్​ ఇండియాకు చెందిన సెంట్రలైస్డ్​ ప్రాసెసింగ్​ సెంటర్​కు వెళ్లి ఖాతాలోని బ్యాలెన్స్​ చెక్​ చేయించారు. అయితే.. తమ ఖాతాల్లో భారీగా నగదు ఉన్నట్లు తెలుసుకుని షాక్​కు గురయ్యారు. విశ్వాస్​ ఖాతాలో రూ.60 కోట్లు, కుమార్​ ఖాతాలో రూ.900 కోట్లు జమయ్యాయి.

ఈ సంఘటనపై బ్రాంచ్​ మేనేజర్​ మనోజ్​ గుప్తా ఆశ్చర్యానికి గురయ్యారు. వెంటనే ఇద్దరి ఖాతాలను నిలిపివేశారు. దీనిపై పైఅధికారులకు సమాచారం అందించారు గుప్తా. ఎక్కడి నుంచి వచ్చాయనే విషయంపై దర్యాప్తు చేపట్టినట్లు తెలిపారు.

ఇదీ చూడండి: 'నా ఖాతాలో ఆ డబ్బు మోదీనే జమచేశారు.. నేనివ్వను'