సరిహద్దులో పాకిస్థాన్ సైన్యం కవ్వింపు చర్యలకు పాల్పడుతూనే ఉంది. జమ్ముకశ్మీర్ పూంఛ్ జిల్లా నియంత్రణ రేఖ వెంబడి ఉన్న గ్రామాలే లక్ష్యంగా మోర్టార్ షెల్స్ విసిరింది. చిన్న చిన్న ఆయుధాలతో దాడులకు తెగబడింది. ఈ ఘటనలో 18ఏళ్ల యువకుడు ప్రాణాలు కోల్పోయాడు. మరో యువకుడు గాయపడ్డాడు. క్షతగాత్రుడిని ఆసుపత్రికి తరలించారు.
పాక్ సైన్యం చర్యకు భారత బలగాలు దీటుగా బదులిచ్చినట్లు అధికారులు తెలిపారు. ఇవాళ రాత్రి 7గంటల సమయంలో పాక్ సేనలు కాల్పుల విరమణ ఒప్పందాన్ని ఉల్లంఘించినట్లు పేర్కొన్నారు.
వరుసగా 24వ రోజు..
సరిహద్దు లక్ష్యంగా పాక్ సైన్యం కాల్పుల విరమణ ఒప్పందాన్ని ఉల్లంఘించడం ఇది వరుసగా 24వ రోజు అని అధికారులు వెల్లడించారు. గత రెండు రోజులుగా పూంఛ్ జిల్లాలోని ఖస్బా, కిర్ని, షాపూర్, మాన్కోట్ సెక్టార్లలో దాడులకు పాల్పడినట్లు చెప్పారు.
పాక్ చర్యలతో నియంత్రణ రేఖ వెంబడి ఉన్న రాజౌరి, పూంఛ్, కుప్వారా జిల్లాల్లోని ప్రజలు తీవ్ర భయాందోళనకు గురవుతున్నారు. ఈ ప్రాంతాల్లో ఈ నెలలోనే నలుగురు పౌరులు పాక్ సైన్యం దాడుల్లో మరణించారు.
ఈ ఏడాది జనవరి 1 నుంచి ఫిబ్రవరి 23వరకు పాకిస్థాన్ ఏకంగా 646 సార్లు కాల్పుల విరమణ ఒప్పందాన్ని ఉల్లంఘించినట్లు రక్షణ శాఖ మార్చిలో తెలిపింది.
