మనుషుల అస్థికలు దాచే బ్యాంకు ఇది...
గుజరాత్ అహ్మదాబాద్లోని ఈ బ్యాంకులో డబ్బు, బంగారం, భూపత్రాలు ఏవీ ఉండవు. కేవలం మానవ అస్థికలు మాత్రమే ఉంటాయి. అవును మరి, ఈ బ్యాంకు కేవలం అస్థికలు భద్రపరిచేందుకు ఏర్పాటు చేసిందే. తమ ఆత్మీయులు మరణించాక ఆ అస్థికలు గంగలో కలిపేవరకు వాటిని ఇక్కడ జాగ్రత్తగా దాచుకుంటారు ఛార వంశస్థులు.
ఎన్నేళ్లైనా అక్కడే...
ఛారనగర్లో నివసించే ఛార వర్గంవారు తరతరాలుగా అస్థికలు భద్రపరిచే ఆచారాన్ని పాటిస్తున్నారు. ఛార వర్గంలో ఓ వ్యక్తి మరణిస్తే... అంతిమ సంస్కారాలు నిర్వహించిన అనంతరం ఓ డబ్బాలో బూడిద, ఎముకలు వేస్తారు. డబ్బాపై మరణించిన వ్యక్తి పేరు రాసి జాగ్రత్తగా దాస్తారు. ఆ తరువాత మరణించిన వ్యక్తి బంధువులు వచ్చి వాటిని తీసుకెళ్తారు.
ఛార వంశీయులు ఎన్నేళ్ల తరువాత వచ్చినా.. వారి ఆత్మీయుల అస్థికలు ఈ బ్యాంకులో పదిలంగా ఉంటాయని చెబుతున్నారు బ్యాంకు నిర్వహకులు.
