నదిలో మునిగిపోయిన ఇద్దరు పురుషులను చీరల సాయంతో కాపాడి.. అందరి ప్రశంసలు పొందుతున్నారు తమిళనాడుకు చెందిన ముగ్గురు మహిళలు.
ఇదీ జరిగింది?
పెరంబలూర్ జిల్లా సిరువాచుర్ ప్రాంతానికి చెందిన రంజిత్ అనే ఓ శిక్షణా వైద్యుడు తన స్నేహితుడితో కలిసి కొట్టరై మరూతాయార్ నదికి వెళ్లాడు. ఒడ్డున నిల్చొని నది అందాలను వీక్షిస్తుండగా.. కాలుజారి నీటిలోకి పడిపోయారు. ఇద్దరికీ ఈత రాకపోవడం వల్ల ప్రాణాలు కాపాడుకునేందుకు విశ్వప్రయత్నాలు చేశారు.
అదే నదిలో స్నానం చేసేందుకు వచ్చిన శెంతామిళ్సెల్వి, ముత్తమ్మళ్, ఆనంద వల్లి అనే ముగ్గురు మహిళలు.. ప్రాణాల కోసం పోరాడుతున్న రంజిత్, అతడి మిత్రుడ్ని చూశారు. ఏ మాత్రం ఆలస్యం చేయకుండా ధైర్యంగా వారిని కాపాడటానికి ముందుకొచ్చారు. తమ చీరల సాయంతో బయటకు లాగి వారికి ప్రాణం పోశారు.
విషయం తెలుసుకున్న గ్రామస్థులు, జిల్లా పోలీసులు ఆ ముగ్గురు మహిళల్ని మెచ్చుకున్నారు.
ఇదీ చదవండి: పక్షుల కోసం మూడెకరాల్లో జొన్న పంట!
