పాకిస్థాన్ సైన్యం మరోసారి కాల్పుల విరమణ ఒప్పందాన్ని ఉల్లంఘించింది. కశ్మీర్ పూంఛ్ జిల్లాలో నియంత్రణరేఖ వెంబడి ఉన్న గ్రామాలే లక్ష్యంగా కాల్పులకు తెగబడింది. ఫలితంగా ఓ 24 ఏళ్ల మహిళ ప్రాణాలు కోల్పోయింది. మరో నాలుగు మూగజీవాలు మృత్యువాతపడ్డాయి. చాలా ఇళ్లు తీవ్రంగా దెబ్బతిన్నాయి.
ఉదయం 9.30 గంటల నుంచి పూంఛ్లోని కస్బా, కిర్ని సెక్టార్ల వెంబడి చిన్న ఆయుధాలు, మోర్టార్ షెల్లతో పాక్ సైన్యం దాడులు చేస్తోందని ఓ అధికారి తెలిపారు. భద్రతాదళాలు పాక్ దాడులను దీటుగా తిప్పికొడుతున్నాయని చెప్పారు.
పాక్ దాడుల వల్ల సమీపంలోని షాపూర్ సెక్టార్ ప్రజలు భయాందోళనలకు గురయ్యారని ఓ పోలీసు అధికారి తెలిపారు. కాల్పుల సమయంలో ఎక్కువ మంది ఇళ్లలోనే తలదాచుకున్నారని, మోర్టార్ షెల్ తగలడం వల్ల 'అక్తర్' అనే మహిళ మృతిచెందిందని ఆయన వెల్లడించారు.
గత నాలుగు రోజుల్లో వేర్వేరు చోట్ల పాక్ చేసిన దాడుల్లో మరణించినవారి సంఖ్య 3కు చేరింది.
ఇదీ చూడండి: బంగారం మళ్లీ వృద్ధి బాట.. నేడు 10 గ్రాముల ధరెంతంటే?
