దేశ భద్రతను మరింత పటిష్ఠం చేయడమే లక్ష్యంగా త్రివిధ దళాలకు ఉమ్మడి సారథ్యం వహించే 'చీఫ్ ఆఫ్ డిఫెన్స్ స్టాఫ్(సీడీఎస్)'ను నియమించాలని నిర్ణయం తీసుకున్నట్లు ప్రధాని నరేంద్ర మోదీ ప్రకటించారు. ఎర్రకోటలో స్వాతంత్ర్య వేడుకల్లో ఈ విషయాన్ని వెల్లడించారు. ఇది గొప్ప నిర్ణయమని మోదీపై ప్రశంసల జల్లు కురిపిస్తున్నారు విశ్రాంత సైన్యాధికారులు, భద్రతా నిపుణులు. 19ఏళ్లుగా ప్రతిపాదనకే పరిమితమైన సీడీఎస్.. కార్యరూపం దాల్చితే జాతీయ భద్రత మరింత బలోపేతమవుతుందని ధీమా వ్యక్తం చేశారు.
మోదీ నిర్ణయం చరిత్రాత్మకమని హర్షం వ్యక్తం చేశారు మాజీ సైన్యాధిపతి వీ.పీ మాలిక్.
" చీఫ్ ఆఫ్ డిఫెన్స్ స్టాఫ్ని నియమిస్తామని ప్రకటించినందుకు ప్రధానికి కృతజ్ఞతలు. ఈ నిర్ణయంతో జాతీయ భద్రత మరింత పటిష్ఠం అవుతుంది. ఉమ్మడి, బహుళ క్రమశిక్షణా సహకారానికి ఇది దోహదపడుతుందని కచ్చితంగా చెప్పగలను "
- వీపీ.మాలిక్, మాజీ సైన్యాధిపతి
చాలా ఏళ్లుగా పెండింగ్లో ఉన్న ప్రతిపాదన ఎట్టకేలకు కార్యరూపం దాల్చనుందని.. కేంద్రం నిర్ణయాన్ని స్వాగతిస్తున్నట్లు చెప్పారు మాజీ నావికాదళాధిపతి సునిల్ లన్బా.
కార్గిల్ యుద్ధ సమయంలో ఆర్మీ చీఫ్‌గా వ్యవహరించిన వేద్‌ప్రకాశ్‌ మాలిక్ ఈ నిర్ణయాన్ని స్వాగతించారు. ఈ సందర్భంగా మోదీ ప్రభుత్వాన్ని అభినందించారు.
లెఫ్టినెంట్‌ జనరల్‌ దీపేంద్ర సింగ్‌ హుడా స్పందిస్తూ.. దేశ రక్షణకు సంబంధించిన విషయాల్లో సలహాలు ఇచ్చేందుకు మిలిటరీ వ్యవస్థలపై ఎన్‌ఎస్‌ఏకు అనుభవం లేదని, సీడీఎస్ పోస్ట్‌ను తీసుకురావాల్సిన అవసరం ఉందని తెలిపారు.
సీడీఎస్ ఏర్పాటు ప్రక్రియ వివరాలు తెలిసేవరకూ వేచి చూడాలన్నారు వాయుసేన మాజీ అధికారి మన్మోహన్ బహదుర్.
" సీడీఎస్ బాధ్యతలకు సంబంధించిన వివరాలు తెలియాల్సి ఉంది. ఈ పదవి చేపట్టే వారు ముఖ్య కార్యాచరణ అధికారిగా ఉంటారా? లేక.. కార్గిల్ సమీక్ష కమిటీ సూచించినట్లుగా సీడీఎస్ను కార్యాచరణ బాధ్యతలకు దూరంగా ఉంచుతారా? ఈ కీలక అంశాలపై స్పష్టత రావాల్సి ఉంది. "
-మన్మోహన్ బహదూర్, వాయుసేన మాజీ అధికారి
ఇదీ చూడండి: మోదీ 2.0: 'త్రివిధ దళాలకు ఉమ్మడి సారథి'
