అక్టోబర్ 4న జరిగే సివిల్ సర్వీసెస్ ప్రిలిమినరీ పరీక్షకు హాజరయ్యే అభ్యర్థులు తమ పరీక్ష కేంద్రాలు మార్చుకునేందుకు యూనియన్ పబ్లిక్ సర్వీస్ కమిషన్(యూపీఎస్సీ) అవకాశం కల్పించింది. కరోనా కారణంగా తమ పరీక్ష కేంద్రాలు మార్చుకునేందుకు వెసులుబాటు కల్పించాలంటూ.. పెద్ద ఎత్తున అభ్యర్థనలు వచ్చిన నేపథ్యంలో కమిషన్ ఈ నిర్ణయం తీసుకుంది.
అలాగే సివిల్ సర్వీసెస్ మెయిన్ ఎగ్జామ్‌తో పాటు ఐఎఫ్ఎస్ మెయిన్స్ పరీక్షల కేంద్రాలూ మార్చుకునేందుకూ అవకాశం ఉంటుందని తెలిపింది యూపీఎస్సీ.
రెండు దశల్లో..
పరీక్షా కేంద్రం మార్పు ప్రక్రియ రెండు దశల్లో ఉంటుందని తెలిపింది కమిషన్. తొలి దశ జులై 7 నుంచి 13 సాయంత్రం 6 గంటల వరకు, రెండో దశ జులై 20 నుంచి 24 సాయంత్రం 6 గంటల వరకు ఉంటుందని పేర్కొంది. upsconline.nic.in లోకి వెళ్లి మార్చుకోవాలని సూచించింది.
వారికే తొలి ప్రాధాన్యం..
సదరు పరీక్షా కేంద్రాల్లో అవకాశాలను బట్టి.. ఆ కేంద్రాన్ని కేటాయిస్తామని కమిషన్ వివరించింది. ముందుగా దరఖాస్తు చేసుకున్న వారికే తొలి ప్రాధాన్యం ఉంటుందని స్పష్టం చేసింది. ఒకవేళ వారు కోరుకున్న కేంద్రం కేటాయించేందుకు సీలింగ్ కారణంగా కుదరకుంటే మరో పరీక్షా కేంద్రాన్ని ఎంచుకోవచ్చని తెలిపింది.
ఇదీ చూడండి: సివిల్స్ ప్రిలిమినరీ పరీక్ష తేదీ ఖరారు
