దేశంలో జరుగుతున్న వరుస అత్యాచార ఘటనలపై ఆగ్రహజ్వాలలు వెల్లువెత్తుతున్నప్పటికీ.. కామాంధుల కర్కశత్వానికి హద్దులేకుండా పోతోంది. అత్యాచారానికి గురవుతున్న బాధితుల సంఖ్య పెరిగిపోతూనే ఉంది.
హాథ్రస్, బలరాంపుర్ ఘటనలు మరవక ముందే ఉత్తర్ప్రదేశ్లోని సికిందర్పుర్లో 15 ఏళ్ల బాలికపై బలాత్కారం జరిగింది. బాలికను అపహరించి అఘాయిత్యానికి ఒడిగట్టాడు ఓ కిరాతకుడు.
ఆసిఫ్(23)ను నిందితుడిగా గుర్తించి అరెస్టు చేసినట్లు పోలీసులు తెలిపారు. బుధవారం(సెప్టెంబర్ 30న) ఈ ఘటన జరిగిందని వెల్లడించారు. బాలిక తండ్రి ఇచ్చిన ఫిర్యాదు మేరకు కేసు నమోదు చేసినట్లు పోలీసులు తెలిపారు. బాధితురాలిని జిల్లా ప్రభుత్వ ఆస్పత్రిలో పరిశీలనలో ఉంచినట్లు వెల్లడించారు.
యూపీలో మరోటి..
ఉత్తర్ప్రదేశ్లోని సహారాన్‌పుర్‌లో ఇద్దరు మైనర్ యువకులు ఓ యువతిపై అత్యాచారానికి పాల్పడ్డారు. నాకూర్ పోలీస్ స్టేషన్ పరిధిలో నివసిస్తున్న బాధితురాలు.. తన ఇంట్లో నిద్రిస్తుండగా, ఇద్దరు యువకులు రాత్రి సమయంలో ఇంట్లోకి చొరబడి.. బలాత్కారం చేశారు. ఈ ఘటనపై విచారణ చేపట్టిన పోలీసులు.. ఇద్దరు యువకులను అరెస్టు చేశారు. బాధితురాలిని వైద్య పరీక్షల కోసం ఆస్పత్రికి పంపించారు.
కన్న కూతురిపైనే..!
గుజరాత్ సూరత్లో కన్న తండ్రే కామాంధుడిగా మారి తన ఏడేళ్ల కూతురిపై అఘాయిత్యానికి పాల్పడ్డాడు. బాధితురాలి తల్లి ఇంట్లో లేని సమయం చూసి ఈ దారుణానికి ఒడిగట్టాడు ఆ కసాయి తండ్రి. తల్లి ఇంటికి వచ్చి ఆరా తీయగా.. విషయం బయటపడింది. అనంతరం వరఛా పోలీస్ స్టేషన్ను ఆశ్రయించింది బాధితురాలి తల్లి. బుధవారం జరిగిన ఈ ఘటనలో నిందితుడిని గంట వ్యవధిలోనే అదుపులోకి తీసుకున్నారు పోలీసులు.
ఇదీ చదవండి- ప్రియుడితో కలిసి సొంత చెల్లినే హత్య చేసింది!
