చైనాలో మొదలైన కరోనా వైరస్ ప్రస్తుతం ప్రపంచ దేశాలను భయపెడుతోంది. భారత్లోనూ ఈ మహమ్మారి వేగంగా వ్యాప్తి చెందుతోంది. తాజాగా మహారాష్ట్రలో ఇద్దరికి కరోనా వైరస్ సోకినట్లు వైద్యులు ధ్రువీకరించారు. వీరిలో ఓ మహిళ, పురుషుడు ఉన్నారు. ప్రస్తుతం వీరిద్దరినీ వైద్యల పర్యవేక్షణలో ఉంచారు. ఈ ఇద్దరితో కలిపి దేశవ్యాప్తంగా కరోనా సోకిన వారి సంఖ్య 47కు చేరింది.
రాష్ట్రాల వారీగా చూస్తే..
దిల్లీ-4, హరియాణా-14 (విదేశీయులు), కేరళ-9, రాజస్థాన్-2 (విదేశీయులు), ఉత్తర్ ప్రదేశ్-9, మహారాష్ట్ర-2, లద్ధాఖ్-2, తెలంగాణ, తమిళనాడు, జమ్ము కశ్మీర్, పంజాబ్, కర్ణాటకలో ఒక్కో కేసు నమోదైంది.
5,400మందికి...
కరోనా వైరస్ నేపథ్యంలో కేంద్ర సాయుధ బలగాలకు ఆదేశాలు జారీ చేసింది ప్రభుత్వం. ఏకకాలంలో 5 వేల 400 మందికిపైగా చికిత్స అందించేందుకు వీలుగా నిర్బంధ కేంద్రాలను ఏర్పాటు చేయాలని తెలిపింది. 75 ఐసోలేషన్ వార్డులను కూడా సిద్ధం చేయాలని స్పష్టం చేసింది.
