జమ్ముకశ్మీర్ షోపియాన్ జిల్లాలో జరిగిన ఎదురుకాల్పుల్లో హిజ్బుల్ ముజాహిద్దీన్ ఉగ్రవాద సంస్థకు చెందిన ఓ కమాండర్ సహా ఐదుగురు ఉగ్రవాదులను భద్రతాబలగాల మట్టుబెట్టాయి. ఉగ్రవాదులు ఆశ్రయం పొందారన్న సమాచారం మేరకు రెబన్ ప్రాంతంలో సైనిక బలగాలు ఇవాళ ఉదయం తనిఖీలు నిర్వహించాయి. ఈ సమయంలో సైన్యానికి తారసపడిన ఉగ్రవాదులు భద్రతా బలగాలపై ఏకపక్షంగా కాల్పులకి తెగబడగా సైన్యం సమర్థంగా తిప్పికొట్టింది. ఉదయం నుంచి ఎదురుకాల్పులు కొనసాగాయి.
ఈ కాల్పుల్లో హిజ్బుల్ ముజాహిద్దీన్ సంస్థకు చెందిన ఐదు మంది ముష్కరులు హతమైనట్లు అధికారులు వెల్లడించారు. ఘటనా స్థలం నుంచి భారీ ఎత్తున ఆయుధాలు, పేలుడు పదార్థాలను స్వాధీనం చేసుకున్నట్లు తెలిపారు.
