సరిహద్దు భద్రతా దళం ప్రధాన కార్యాలయంలోని రెండు అంతస్తులను సీల్ చేశారు అధికారులు. కార్యాలయ సిబ్బందికి కరోనా పాజిటివ్గా తేలిన అనంతరం ఈ నిర్ణయం తీసుకున్నారు. భవనం లోపల, పరిసర ప్రాంతాలను శానిటైజ్ చేశారు.
వివరాల ప్రకారం.. దిల్లీ బీఎస్ఎఫ్ ప్రధాన కార్యాలయంలోని ఒకటో అంతస్తులో విధులు నిర్వర్తిస్తున్న హెడ్ కానిస్టేబుల్కు కరోనా పాజిటివ్గా నిర్ధరణ అయింది. అతడు చివరగా మే1 న ఆఫీసుకు వచ్చినట్లు తెలిపారు అధికారులు. ఆ కానిస్టేబుల్తో సన్నిహితంగా మెలిగిన వారందరినీ గుర్తించి క్వారంటైన్ చేశారు. వారికీ కరోనా పరీక్షలు నిర్వహించనున్నట్లు స్పష్టం చేశారు.
సిబ్బందికి కరోనా సోకిన తర్వాత.. మొదటి రెండు ఫ్లోర్లను సీల్ చేశారు. కరోనా వ్యాప్తి నేపథ్యంలో ప్రస్తుతం పరిమిత సంఖ్యలోనే కార్యాలయ సిబ్బంది విధులు నిర్వహిస్తున్నారు.
దిల్లీ లోధిరోడ్డులోని సీజీఓ కాంప్లెక్స్లో 8 అంతస్తుల భవనంలో బీఎస్ఎఫ్ ప్రధాన కార్యాలయం ఉంది. సీఆర్పీఎఫ్ ప్రధాన కార్యాలయం కూడా ఇందులోనే భాగమై ఉంది. ఇద్దరు సిబ్బందికి కొవిడ్ సోకగా ఆదివారమే సీఆర్పీఎఫ్ ఆఫీసును మూసివేశారు. ఇవాళ.. బీఎస్ఎఫ్ కార్యాలయానికి సీల్ వేశారు.
