"వ్యాక్సిన్ల అత్యవసర వినియోగానికి అనుమతిస్తే అవి శాస్త్రీయంగా పరీక్షలను నెగ్గాయని విశ్వసించాలి. రక్షణ పరంగా ప్రపంచ స్థాయి ప్రమాణాలకు అనుగుణంగా ఉన్నట్లే. వీటి విషయంలో ఎవ్వరికీ ఎలాంటి అనుమానాలు అవసరం లేదు. భద్రత విషయంలో మన వ్యవస్థలు సంపూర్ణమైన బాధ్యతలు తీసుకున్నాయి. ప్రపంచ స్థాయికి మించిన ప్రమాణాలతో పని చేయడానికి ప్రయత్నిస్తున్నాయి." అని నీతి ఆయోగ్ సభ్యుడు వ్యాక్సిన్ టాస్క్ఫోర్స్ ఛైర్మన్ వీకేపాల్ పేర్కొన్నారు. ప్రస్తుతం మొత్తం 6 వ్యాక్సిన్లు వివిధ క్లినికల్ ట్రయల్స్ దశలో ఉన్నట్లు తెలిపారు.
టీకా ఆలస్యం కాదు..
టీకా అత్యవసర వినియోగానికి అనుమతులు కోరతూ భారత్ బయోటెక్, ఫైజర్, సీరం ఇన్స్టిట్యూట్ ఆఫ్ ఇండియాలు చేసుకున్న దరఖాస్తులను పరిశీలిస్తున్నట్లు కేంద్రం మంగళవారం తెలిపింది. ఈ కంపెనీల నుంచి డీసీజీఐ మరింత సమాచారం కోరిందని పేర్కొంది. అలా సమాచారం కోరడం వల్ల టీకాను అందుబాటులోకి తెచ్చే విషయంలో ఆలస్యం చోటుచేసుకోబోదని స్పష్టం చేసింది. కంపెనీలు డీసీజీఐకి సమర్పించిన దరఖాస్తులను కేంద్ర ఔషధ ప్రమాణాల నియంత్రణ సంస్థ (సీడీఎస్సీఓ)లో కొవిడ్19పై ఏర్పడిన నిపుణుల కమిటీ పరిశీలిస్తోందని వీకే పాల్ వివరించారు.
