ఉత్తర్ప్రదేశ్ ముజఫర్నగర్లో భారతీయ కిసాన్ యూనియన్(బీకేయూ) నిర్వహించిన 'మహా పంచాయత్' కార్యక్రమంలో వేల మంది రైతులు పాల్గొన్నారు. దిల్లీ సరిహద్దుల్లో ఆందోళనలు చేస్తున్న రైతులకు మద్దతుగా జీఐసీ మైదానంలో వందల ట్రాక్టర్లలో అన్నదాతలు తరలివచ్చారు. దీంతో ఆ ప్రాంతంలో ట్రాఫిక్ అంతరాయం ఏర్పడింది.
ఆర్ఎల్డీ మద్దతు
రాష్ట్రీయ లోక్ దల్(ఆర్ఎల్డీ) అధినేత అజిత్ సింగ్ బీకేయూకు మద్దతు తెలిపారు. ఆయన తరఫున కుమారుడు, పార్టీ ఉపాధ్యక్షుడు జయంత్ చౌదరి మహా పంచాయత్ కార్యక్రమంలో పాల్గొన్నారు. బీకేయూ అధ్యక్షుడు నరేశ్ టికాయత్, ప్రతినిధి రాకేశ్ టికాయత్తో ఆర్ఎల్డీ అధినేత అజిత్ సింగ్ మాట్లాడారని చౌదరి తెలిపారు.
"ప్రస్తుతం రైతులు జీవన్మరణ సమస్యను ఎదుర్కొంటున్నారు. అయినా అన్నదాతలు దిగులు పడొద్దు. దీనిపై కలిసికట్టుగా పోరాడదాం" అని అజిత్ సింగ్ సందేశాన్ని ట్వీట్ చేశారు జయంత్.
భారతీయ కిసాన్ యూనియన్(బీకేయూ)కు టికాయత్ సోదరులు నేతృత్వం వహిస్తున్నారు. రైతు చట్టాల రద్దును డిమాండ్ చేస్తూ రెండు నెలలుగా ఘాజీపుర్లో ఆందోళనలు చేపడుతున్నారు. అయితే నిరసనకారుల్ని ప్రభుత్వం బలవంతంగా అక్కడి నుంచే పంపేసే అవకాశముందంటూ రాకేశ్ గురువారం భావోద్వేగానికి గురైన నేపథ్యంలో ముజఫర్నగర్ సభకు భారీగా రైతులు తరలిరావడం ప్రాధాన్యం సంతరించుకుంది.
ఇదీ చదవండి : 'రైతులపై దాడితో దేశం బలహీనం'
