ప్లాస్టిక్​ భూతాన్ని తరిమికొట్టారు.. దేశానికే ఆదర్శమయ్యారు!

'ప్లాస్టిక్​ రహిత భారతం'... ప్రధాని నరేంద్ర మోదీ కల. అందుకోసం ప్రజల సహకారంతో పెద్ద ఉద్యమమే చేపట్టింది కేంద్రప్రభుత్వం. ఒకసారి వాడి పడేసే ప్లాస్టిక్​ను ఎక్కడా లేకుండా చేసేందుకు యత్నిస్తోంది. అయితే... మోదీ చెప్పకముందే ఓ గ్రామం ఈ పని చేసిందని తెలుసా?

ప్లాస్టిక్​ భూతాన్ని ఎలా నివారించాలో తెలియక ప్రపంచ దేశాలు సతమతం అవుతుంటే.. రాజస్థాన్​ కోటా జిల్లా కేశవ్​పుర​ గ్రామ ప్రజలు మాత్రం చిటికెలో ఆ పని చేసేశారు. ప్రధాని మోదీ పిలుపుకంటే ముందే ప్లాస్టిక్​ వాడకాన్ని జులైలోనే నిషేధించారు.

మూగజీవాల మరణంతో..

నోరులేని మూగజీవాలు ప్లాస్టిక్​ వస్తువులను తిని చనిపోతుండటం చూసి చలించిపోయారు కేశవ్​పుర​ వాసులు. ఎలాగైనా ప్లాస్టిక్​ వాడకాన్ని నిషేధించి.. ఈ భూతాన్ని ఊరి నుంచి తరిమికొట్టాలనుకున్నారు. ఇందుకోసం ఈ ఏడాది జులై 11న గ్రామ ప్రజలంతా కలిసి కేశవ్​పుర్​లోని ప్లాస్టిక్​ పదార్థాలు సేకరించారు. ఆ వ్యర్థాలను ఓ గొయ్యిలో వేసి నిప్పుపెట్టారు. భవిష్యత్​లో ఎప్పుడూ ప్లాస్టిక్​ వినియోగించమని ప్రతిజ్ఞ పూనారు.

"ఆవులు, గేదెలు తరచూ గ్రామం చుట్టుపక్కల ఉండే ప్లాస్టిక్​ వస్తువులు తిని అనారోగ్యం పాలయ్యేవి. అందుకే ఒకసారి వాడి పడేసే ప్లాస్టిక్​ను తరిమి కొట్టాలని సంకల్పించాం. ఊరు చుట్టుపక్కల ఉన్న ప్లాస్టిక్​ను​ ఒకేచోటకు చేర్చి తగలబెట్టాం."
- కేశవ్​పుర​ గ్రామస్థుడు

దేశానికే ఆదర్శం..

ప్రజల అంగీకారంతో కేశవ్​పుర​లో ప్లాస్టిక్​ వాడకాన్ని పూర్తిగా నిషేధించింది ఆ గ్రామ అభివృద్ధి కమిటీ. పెళ్లిళ్లు, ఇతర వేడుకల్లో భోజనాల సందర్భంగా కూడా ప్లాస్టిక్​ ప్లేట్లు, గ్లాసులు వాడకూడదని తీర్మానించింది. ఈ నిర్ణయం తర్వాత ఇప్పటివరకు 11 వేడుకలు జరిగినా... ఎక్కడా ప్లాస్టిక్​ జాడలేదు.

ఆఖరికి చెత్త సేకరణకు ప్లాస్టిక్​ బుట్టల స్థానంలో లోహ డబ్బాలను తీసుకొచ్చింది కేశవ్​పుర్​ గ్రామ అభివృద్ధి కమిటీ. షాపింగ్​కు వెళ్లేందుకు సైతం కాగితం​ లేదా వస్త్ర సంచులను మాత్రమే వినియోగిస్తారు ఇక్కడి ప్రజలు.