యాపిల్​కే మోదీ, షా మొగ్గు... ఆ మంత్రికి మాత్రం రెండు!

సామాజిక మాధ్యమాల ద్వారా నవతరాన్ని ఆకట్టుకోవడంలో భాజపా అగ్రనేతలు దిట్ట. ఫాలోవర్ల విషయంలో ప్రపంచ దేశాధినేతలు అందరిలో మోదీనే టాప్. మరి ఆయన ఏ స్మార్ట్​ఫోన్​ ఉపయోగిస్తారు? మోదీ జట్టులోని ఇతర కీలక నేతలు ఏ బ్రాండ్​కు మొగ్గుచూపారు? ఒక్కొక్కరు ఎన్ని చరవాణిలు వాడుతున్నారు?

ప్రధాని నరేంద్ర మోదీ కేబినెట్​లో టెక్​ప్రియులు చాలా మందే ఉన్నారు. అధునాతన ఫోన్లు, సామాజిక మాధ్యమాలు విస్తృతంగా వాడుతున్నారు. ఇందుకోసం ప్రస్తుతం మార్కెట్​లో అత్యుత్తమంగా ఉన్న ఆండ్రాయిడ్​, యాపిల్​ ఆధారిత ఫోన్లను చేతపట్టుకుంటున్నారు.

మోదీ ఇప్పటికే యాపిల్​ ఫోన్​ను వాడుతుండగా.. తాజాగా ఆ జాబితాలోకి ఆయన సన్నిహితుడు, కేంద్ర హోంమంత్రి అమిత్​ షా చేరారు. యాపిల్​ సంస్థ ఇటీవలే విడుదల చేసిన యాపిల్​ ఎక్స్​ఎస్​ ఫోన్​ను షా వాడుతున్నారు. నేతలు, కార్యకర్తలకు సందేశాలిచ్చేందుకు, సంప్రదించేందుకు, సమాచారం తెలియజేసేందుకు ఆయన ఎక్కువగా ఫేస్​బుక్​, ట్విట్టర్​ను వినియోగిస్తుంటారు. షాకు ట్విట్టర్​లో కోటి 40లక్షల మంది ఫాలోవర్లు ఉన్నారు.

ఆ మంత్రి వద్ద రెండు ఫోన్లు

పెట్రోలియం శాఖ మంత్రి ధర్మేంద్ర ప్రదాన్​ రెండు స్మార్ట్​ఫోన్లు వాడుతున్నారు. ఒకటి ఐఫోన్​ కాగా మరొకటి ఆండ్రాయిడ్​ ఆధారిత మొబైల్​. ఆయన వాట్సప్​, ఫేస్​బుక్​, ట్విట్టర్​ను అధికంగా వాడతారు. ధర్మేంద్రను ట్విట్టర్​లో 11లక్షల మంది అనుసరిస్తున్నారు.

కేంద్ర రోడ్డు రవాణా శాఖ మంత్రి నితిన్​ గడ్కరీ ఫేస్​బుక్​, ట్విట్టర్​లో చురుగ్గా ఉంటారు. తన జట్టుకు, కార్యకర్తలకు దిశానిర్దేశం చేసేందుకు ఆయన ఈ రెండు యాప్​లను విస్తృతంగా వినియోగిస్తున్నారు. ఆయనకు ట్విట్టర్​లో 51లక్షల మంది ఫాలోవర్లు ఉన్నారు.

ఆర్థిక శాఖ మంత్రి నిర్మలా సీతారామన్​ ట్విట్టర్​ను ఎంతగా వినియోగిస్తారో అందరికీ తెలుసు. ప్రభుత్వ కార్యక్రమమైనా, సొంత పనైనా ఇట్టే ట్విటర్​లో సమాచారమిస్తారు. మోదీ ప్రభుత్వ కార్యక్రమాల గురించి ప్రచారం చేయడానికి ఆమె సామాజిక మాధ్యమాలను అస్త్రంగా వాడారు. వాడుతున్నారు. ఆమెకు ట్విట్టర్​లో ప్రస్తుతం 22 లక్షల మంది ఫాలోవర్లు ఉన్నారు.

ఉక్కు శాఖ సహాయ మంత్రి ఫగ్గన్​సింగ్​ కూడా రెండు ఫోన్లు వాడుతున్నారు. ఒకటి ఐఫోన్​ కాగా మరొకటి శామ్​సంగ్​ కీ ప్యాడ్​ ఫోన్​. ఆయన వాట్సప్ సహా ట్విట్టర్​, ఫేస్​బుక్​ ఎక్కువగా వాడతారు.

ఈశాన్య దిల్లీ ఎంపీ, భాజపా దిల్లీ అధ్యక్షుడు మనోజ్​ తివారీ ఐఫోన్​ వినియోగిస్తున్నారు. ట్విట్టర్​ను ఎక్కువగా వాడుతూ పార్టీ శ్రేణులకు సందేశాలివ్వడం, వారిని సమన్వయపరచడంలో ఆయన దిట్ట. ఆయనకు మొత్తం 7.6 లక్షల మంది ఫాలోవర్లు ఉన్నారు.

గతేడాది చైనా, దుబాయ్​ పర్యటనల్లో మోదీ ఐ ఫోన్​ వాడుతున్నట్టు కనపడింది. భద్రతా కారణాల రీత్యా ఆయన యాపిల్​కు సంబంధించిన హైఎండ్​ గాడ్జెట్స్​నే వాడుతున్నారు.

ట్రంప్​ కంటే మోదీకే ఎక్కువ

ప్రధాని నరేంద్ర మోదీకి ట్విట్టర్​లో మొత్తం 4 కోట్ల 80 లక్షలకు పైగా ఫాలోవర్లు ఉన్నారు. వివిధ సామాజిక మాధ్యమాల్లో మొత్తం ప్రపంచవ్యాప్తంగా 11కోట్ల మంది ఆయనను అనుసరిస్తున్నారు. ఈ విషయంలో మోదీ కంటే అమెరికా అధ్యక్షుడు డొనాల్డ్​ ట్రంప్​ వెనుకబడ్డారు. అగ్రరాజ్యాధినేతకు మొత్తం ఫాలోవర్లు 9 కోట్ల 60లక్షల మంది.

2 నుంచి 268కి..

మోదీ నాయకత్వంలో ఫోన్లు అత్యధికంగా ఉత్పత్తి చేస్తున్న రెండో దేశంగా భారత్ ఎదిగింది. 2014లో దేశంలో రెండు మొబైల్​ తయారీ పరిశ్రమలుంటే ప్రస్తుతం వాటి సంఖ్య తయారీ యూనిట్లతో కలుపుకుంటే 268కి చేరింది.