'వేలం పాడండి.. ఎన్నికలు లేకుండా పదవులు పొందండి!'

'రూ.50 లక్షలు ఒకటో సారి.. రూ.50 లక్షలు రెండో సారి.. రూ.50 లక్షలు మూడో సారి'... ఈ వేలంపాట సాగేది మ్యూజియంలోని ఏ పెయింటింగ్​ కోసమో, చారిత్రక వస్తువు కోసమో కాదు. గ్రామ సర్పంచ్​ పదవి కోసం. అవును.. తమిళనాడులోని ఓ గ్రామంలో సర్పంచ్​ మాత్రమే కాదు పంచాయతీలోని అన్ని పదవులూ లక్షల రూపాయలకు అమ్ముడుపోయాయి.

'ప్రజాస్వామ్యానికి భారత దేశం నిలువెత్తు నిదర్శనం.. నాయకులు పాలకులు కాదు, ప్రజా సేవకులు.. ఓటు హక్కు మనందరి బాధ్యత' ఇవ్వన్నీ ఒట్టి మాటలేనని కట్టిపెట్టేశారు తమిళనాడు కడలూరు​ జిల్లాలోని నడుకుప్పం గ్రామస్థులు. పంచాయతీ ఎన్నికలు, ఫలితాలు ఈ తతంగం అంతా మాకెందుకు అనుకున్నారు. అందుకే మార్కెట్​లో వస్తువులను వేలం వేసినట్టుగా గ్రామ పంచాయతీ పదవులను వేలం వేశారు. సర్పంచ్​ పీఠాన్ని రూ.50 లక్షలకు అమ్ముకున్నారు.

తమిళనాడులో డిసెంబర్ 27, 30 తేదీల్లో గ్రామ పంచాయతీలకు ఎన్నికలు జరగనున్నాయి. అయితే, ఎన్నికల నియమావళిని, ప్రజాస్వామ్య సిద్ధాంతాన్ని తుంగలో తొక్కి డబ్బు ఉన్నవాడికే పట్టం కట్టారు నడుకుప్పం గ్రామస్థులు. శక్తివేల్​.. రూ.50 లక్షల రూపాయలు పెట్టి అధికార అన్నాడీఎంకే తరఫున సర్పంచ్ పదవిని కొనుగోలు చేశారు. ప్రతిపక్ష డీఎండీకే నుంచి మురుగన్​ రూ.15 లక్షలు పోసి ఉప సర్పంచ్​ పదవిని కొనేశారు.

ఈ నెల 15వ తేదీలోగా ఆ నగదును వారు చెల్లించి, పదువులను స్వీకరించాల్సి ఉంటుంది. ఆ ఇద్దరూ డబ్బు చెల్లించేస్తే.. గ్రామంలోని మరెవరూ ఎన్నికలకు నామినేషన్​ వేయకూడదనేది అక్కడి ప్రజల తీర్మానం.

ఇదంతా వీడియో తీసి సామాజిక మాధ్యమాల్లో పంచుకున్నారు కొందరు ఔత్సాహికులు. ఆ వీడియో కాస్తా వైరల్​ అయ్యి.. జిల్లా కలెక్టర్​ వరకు చేరింది. ఆయన ఎలాంటి చర్యలు తీసుకుంటారనేది వేచి చూడాలి మరి!

ఇదీ చదవండి:ఉద్విగ్న క్షణం: పదేళ్ల తరువాత ఎదురుపడ్డ తల్లి, తనయుడు