సార్క్ సమావేశంలో పాక్​ వక్రబుద్ధి- కశ్మీర్​ అంశం ప్రస్తావన

సందర్భం దొరికిన ప్రతిసారి భారత్​పై అక్కసు వెళ్లగక్కే పాకిస్థాన్​ మరోసారి తన వక్రబుద్ధిని చాటుకుంది. కరోనాను ఎదుర్కొనేందుకు ఏర్పాటు చేసిన సార్క్​ సభ్యుల సమావేశంలో కశ్మీర్​ విషయంపై విషం కక్కింది పాక్​. కశ్మీర్​ ప్రజలపై నిర్బంధాన్ని ఎత్తివేయాలంటూ అసందర్భ వ్యాఖ్యలు చేసింది.

పాకిస్థాన్​ తన దుర్బుద్ధిని మరోసాసారి చాటుకుంది. ప్రధానమంత్రి నరేంద్ర మోదీ అధ్యక్షతన జరిగిన సార్క్ దేశాధినేతల వీడియో కాన్ఫరెన్స్​లో కశ్మీర్​ అంశాన్ని ప్రస్తావించి తన అక్కసును వెళ్లగక్కింది. కొవిడ్ వైరస్​పై పోరాటానికి ఏర్పాటు చేసిన సమావేశ ఉద్దేశాన్ని బేఖాతరు చేస్తూ కశ్మీర్​ నిర్బంధంపై వక్ర భాష్యం పలికింది.

ఈ సమావేశానికి పాక్​ తరఫున ఆ దేశ ఆరోగ్య మంత్రి జాఫర్​ మిర్జా హాజరయ్యారు. జమ్ముకశ్మీర్​లోనూ కొవిడ్ కేసులు నమోదయ్యాయంటూ అనవసర విషయాలు ప్రస్తావించారు. ఆరోగ్య అత్యవసర పరిస్థితి నేపథ్యంలో కశ్మీర్​లోని నిర్బంధాన్ని ఎత్తివేయాలని చెప్పుకొచ్చారు.

"కరోనా నేపథ్యంలో సార్క్​ సభ్య దేశాలన్నీ... అన్ని ప్రాంతాల ప్రజలకు అత్యవసర సహాయం అందిస్తాయని ఆశిస్తున్నాం. జమ్ముకశ్మీర్​లోనూ కొవిడ్-19 గుర్తించడం ఆందోళన కలిగిస్తోంది. ప్రస్తుత ఆరోగ్య అత్యవసర పరిస్థితుల నేపథ్యంలో వివాదాస్పద ప్రాంతంలో నిర్బంధాన్ని ఎత్తివేసి మందులు సరఫరా చేయడం, రవాణ సౌకర్యం కల్పించడం చాలా ముఖ్యం."-జాఫర్ మిర్జా, పాకిస్థాన్ ఆరోగ్య మంత్రి

దీటుగా భారత్​ బదులు...

పాక్​ వ్యాఖ్యలపై భారత్​ ఘాటుగా స్పందించింది. మాట్లాడటం రాని తమ ఆరోగ్యమంత్రిని సార్క్​ సమావేశానికి పాక్​ పంపిందని భారత్​ పేర్కొంది. మానవీయ అంశాన్ని కూడా రాజకీయం చేయాలని పాక్​ యత్నించడం సరైన పని కాదని హితవు పలికింది.​

ఇదీ చదవండి: కరోనాపై పోరుకు సార్క్​ దేశాల అత్యవసర నిధి