'పోలీసులు లేరు... దిల్లీలో అల్లర్లు ఆపలేం'

దిల్లీలో చెలరేగుతున్న అల్లర్లను తక్షణమే నియంత్రించేందుకు సరిపడా పోలీసులు లేరని పోలీస్​ విభాగం తెలిపింది. కేంద్ర హోంశాఖతో భేటీ అయిన దిల్లీ పోలీస్​ విభాగం ఈ మేరకు నివేదించింది.

దేశ రాజధానిలో పోలీసుల కొరత ఉందని కేంద్ర హోంశాఖకు దిల్లీ పోలీసు శాఖ నివేదించింది. కేంద్ర హోంశాఖ ఉన్నతాధికారులతో భేటీ అయిన పోలీస్ కమిషనర్​ అమూల్య పట్నాయక్​... దిల్లీలో జరుగుతున్న అల్లర్లను తక్షణమే నియంత్రించేందుకు సరిపడా సిబ్బంది లేరని తెలిపారు.

సిబ్బంది లేని కారణంగానే పరిస్థితులు ఆందోళనకరంగా మారుతున్నాయని దిల్లీ పోలీసులు స్పష్టం చేశారు. అయినప్పటికీ హింస చెలరేగిన ప్రాంతాల్లో ఒక బెటాలియన్​ సాయుధ బలగాలను మోహరించామని ఒక అధికారి తెలిపారు.

"దిల్లీ పోలీసులకు 35 పారామిలిటరీ బలగాలను ఇచ్చారు. ఇందులో 20 కంపెనీలను అమెరికా అధ్యక్షుడి పర్యటనకే వినియోగించారు."

-సీనియర్ అధికారి

ఈశాన్య దిల్లీలో ఆదివారం పౌర నిరసనలు హింసాత్మకంగా మారాయి. సీఏఏ వ్యతిరేక, అనుకూల వర్గాల మధ్య అప్పటి నుంచి ఘర్షణలు జరుగుతున్నాయి. ఈ అల్లర్లలో ఒక హెడ్​ కానిస్టేబుల్​ సహా మొత్తం 9 మంది మృతి చెందారు. మరో 160 మందికిపైగా గాయపడ్డారు. ఇవాళ కూడా పలు చోట్ల ఉద్రిక్త పరిస్థితులు నెలకొన్నాయి.

ఇదీ చూడండి: పౌర సెగ: రణరంగంలా దిల్లీ- 10 మంది మృతి