తూర్పు లద్దాఖ్ సరిహద్దులో చైనాతో ఉద్రిక్త పరిస్థితులు నెలకొన్న తరుణంలో కాంగ్రెస్పై భాజపా చేసిన విమర్శలను ఖండించింది శివసేన. చైనా నుంచి రాజీవ్ గాంధీ ఫౌండేషన్కు నిధులు సమకూరాయని కమలం పార్టీ చేసిన ఆరోపణలపై మండిపడింది. సరిహద్దులో చైనా చొరబాట్లకు, 20మంది అమరులైన ఘటనకు ఈ విషయంతో సంబంధం ఏంటని ప్రశ్నించింది. తూర్పు లద్దాఖ్లో చైనా బలగాలు భారత భూభాగంలోకి అడుగుపెట్టాయో లేదో చెప్పాలని విపక్షాలు అడుగుతున్న ప్రశ్నలకు భాజపా సమాధానం చెప్పాలని తన అధికారిక పత్రిక సామ్నాలో వ్యాసం ప్రచురించింది సేన.
"కాంగ్రెస్కు చైనా నుంచి నిధులు అందాయని భాజపా చేసిన ఆరోపణలకు అర్థమేంటి? చైనా చొరబాట్లకు సంబంధించి సోనియా గాంధీ, రాహుల్ గాంధీ లేవనెత్తిన ప్రశ్నలకు సమాధానం చెప్పకుండా.. చైనా నుంచి కాంగ్రెస్కు నిధులు వస్తున్నాయని భాజపా నేతలు ఆరోపిస్తున్నారు. భాజపా బహిర్గతం చేసిన ఈ విషయాలతో సరిహద్దులో చైనా తన కార్యకలాపాలను నిలిపివేస్తుందా? నిధులకు, చైనా చొరబాట్లకు సంబంధమేంటి? కాంగ్రెసే కాదు చాలా పార్టీలకు విదేశాల నుంచి నిధులు సమకూరుతాయి. ఈ విషయంపై భాజపా మాట్లాడటం బురదలోకి రాయి విసరడం లాంటిదే. చైనా అధ్యక్షుడు జిన్పింగ్ గత ఆరేళ్లలో రెండు సార్లు భారత్లో పర్యటించారు. ఆయనకు గుజరాత్లోనూ ఆతిథ్యం ఇచ్చారు. చైనా వెన్నుపోటు పొడిచిందన్నది వాస్తవం. ఓ వైపు చర్చలు జరపడం.. మరోవైపు సరిహద్దులో దుశ్చర్యలకు పాల్పడటం చైనాకు అలవాటే. అది వారి పాత విధానమే. ప్రస్తుత పరిస్థితుల్లో యావత్ దేశం ప్రధాని మోదీకి మద్దతుగా నిలబడుతుంది. ఇది కాంగ్రెస్, భాజపాల సంక్షోభం కాదు. దేశ ప్రతిష్టకు సంబంధించిన విషయం. మీరు కావాలంటే తర్వాత తగువులాడండి. ఇప్పుడు మాత్రం చైనాపై పోరాడండి. ఆ విషయంపై మాత్రమే మాట్లాడండి"
-సామ్నా పత్రికలో శివసేన.
గాంధీ కుటుంబాన్ని లక్ష్యంగా చేసుకుని రాజీవ్ గాంధీ ఫౌండేషన్కు చైనా నుంచి నిధులు వచ్చాయని గురువారం ఆరోపించారు భాజపా అధ్యక్షుడు జేపీ నడ్డా. దీనిపై కాంగ్రెస్ తీవ్రంగా స్పందించింది. సరిహద్దులో వాస్తవాధీన రేఖ వద్ద సంక్షోభం నుంచి ప్రజల దృష్టిని మళ్లించేందుకే భాజపా ఈ ఆరోపణలు చేస్తోందని ధ్వజమెత్తింది.
