దేశంలో కరోనాపై పోరుకు ప్రజలు, సంస్థలు అందిస్తున్న విరాళాలు.. "పీఎం కేర్స్"కి బదులు ఎన్డీఆర్ఎఫ్ నిధికి చేరాలని దాఖలైన పిల్పై స్పందించాలంటూ కేంద్రాన్ని ఆదేశించింది సుప్రీంకోర్టు. కరోనా వైరస్ను ఎదుర్కొనేందుకు విపత్తు నిర్వహణ చట్టం కింద ఓ జాతీయ ప్రణాళికను రూపొందించి, అమలు చేయడంపైనా స్పందించాలని స్పష్టం చేసింది.
పీఎం కేర్స్లోని నిధులను ఇప్పటివరకు ఏ విధంగా ఉపయోగించారన్న విషయంపై కేంద్రం నుంచి ఎలాంటి స్పందన లేదని పిల్ ఆరోపించింది. సెంటర్ ఫర్ పబ్లిక్ ఇంట్రెస్ట్ లిటిగేషన్(సీపీఐఎల్) అనే ఎన్జీఓ దాఖలు చేసిన ఈ పిటిషన్లో.. ఇప్పటివరకు అందిన నిధులను కూడా ఎన్డీఆర్ఎఫ్కు అందించే విధంగా ఆదేశాలు జారీ చేయాలని సుప్రీంను కోరింది. కరోనా వైరస్, లాక్డౌన్ వల్ల ఇబ్బందులు ఎదుర్కొంటున్న వారికి అందించే సహాయంపై కేంద్రం కనీస ప్రమాణాలను నిర్దేశించాలని కూడా ఈ వ్యాజ్యం కోరింది.
ఈ మేరకు జస్టిస్ అశోక్ భూషణ్, జస్టిస్ ఎస్.కే కౌల్, జస్టిస్ ఎమ్ ఆర్ షాతో కూడిన ధర్మాసనం.. రెండు వారాల్లోగా స్పందించాలని కేంద్రాన్ని ఆదేశించింది.
