వలస కూలీలకు సంబంధించి కేంద్రం, రాష్ట్రాలకు సుప్రీంకోర్టు కీలక ఆదేశాలు ఇచ్చింది. ఇతర రాష్ట్రాల్లో చిక్కుకుపోయిన వలస కూలీలను అందరినీ 15 రోజుల్లోగా వారివారి స్వస్థలాలకు చేర్చాలని స్పష్టం చేసింది.
కరోనా లాక్డౌన్ కారణంగా వలస కూలీలు పడుతున్న ఇబ్బందులపై సుమోటోగా విచారించిన జస్టిస్ అశోక్ భూషణ్ నేతృత్వంలోని సుప్రీం ధర్మాసనం ఈ మేరకు తీర్పునిచ్చింది. తొలుత ప్రభుత్వం తరఫున వాదించిన సొలిసిటర్ జనరల్ తుషార్ మోహతా.. వలస కూలీలను తరలించేందుకు జూన్ 3 వరకు 4,200 వేల శ్రామిక్ రైళ్లను నడిపామని తెలిపారు.
రాష్ట్రాలు చెబితేనే..
ఇప్పటివరకు కోటి మంది కూలీలను స్వస్థలాలకు చేర్చామని కోర్టు విన్నవించారు మెహతా. వీటిలో ఉత్తర్ప్రదేశ్, బిహార్కు ఎక్కువ సర్వీసులు నడిపామని స్పష్టం చేశారు.
"అయితే ఈ విషయంలో రాష్ట్ర ప్రభుత్వాల నివేదిక అవసరం. ఎంతమంది కూలీలు ఉన్నారు. ఎన్ని రైళ్లను ఏర్పాటు చేయాలో రాష్ట్రాలే కేంద్రానికి తెలియజేయాల్సి ఉంది."
- తుషార్ మోహతా, సొలిసిటర్ జనరల్
సొంత రాష్ట్రాలకు తిరిగి వెళ్లాలనుకునే వలస కార్మికులకు రైలు లేదా బస్సు ఛార్జీలు వసూలు చేయరాదని మే 28న సుప్రీం కోర్టు ఆదేశాలు జారీ చేసింది. దేశవ్యాప్తంగా చిక్కుకుపోయిన కూలీలకు సంబంధిత అధికారులు ఉచితంగా ఆహారాన్ని అందించాలని మే 28 న ఉన్నత న్యాయస్థానం ఆదేశించింది.
