'సైన్యంలో మహిళలకు శాశ్వత కమిషన్​ కల్పించాల్సిందే'

సాయుధ దళాల్లో లింగ వివక్షకు ముగింపు పలికేలా.. సైన్యంలో మహిళలకు శాశ్వత కమిషన్​ కల్పించాలని కేంద్రాన్ని ఆదేశించింది సుప్రీంకోర్టు. ఈ మేరకు గతంలో దిల్లీ హైకోర్టు తీర్పును సమర్థిస్తూ.. ప్రభుత్వ పిటిషన్​ను తోసిపుచ్చింది న్యాయస్థానం.

సైన్యంలో మహిళా అధికారులకు శాశ్వత కమిషన్​ కల్పించాలని సుప్రీం కోర్టు కీలక తీర్పు వెలువరించింది. సాయుధ దళాల్లో లింగ వివక్షకు ముగింపు పలికేలా ఈ నిర్ణయం తీసుకోవాల్సిందేనని కేంద్రానికి ఆదేశాలు జారీ చేసింది. సైన్యంలో ఉన్న మహిళలకు మూడు నెలల్లోగా శాశ్వత కమిషన్​ కల్పించాలని, వారందరూ.. కమాండ్ పోస్టులు చేపట్టేందుకు కూడా అర్హులేనని స్పష్టం చేసింది.

2010లో దిల్లీ హైకోర్టు ఇచ్చిన తీర్పుపై స్టే విధించాలని సుప్రీంను ఆశ్రయించింది కేంద్రం. ఈ వ్యాజ్యంపై విచారణ జరిపిన న్యాయస్థానం.. దిల్లీ హైకోర్టు తీర్పును సమర్థించింది.

సైన్యంలో మహిళా అధికారులకు శాశ్వత కమిషన్​ కల్పించకూడదన్న నిబంధన హేతువిరుద్ధమని జస్టిస్​ డీవై చంద్రచూడ్​ నేతృత్వంలోని ధర్మాసనం అభిప్రాయపడింది. ప్రభుత్వ నిర్ణయం సమానత్వ హక్కుకు వ్యతిరేకమని స్పష్టం చేసింది. శారీరక పరిమితులు, సామాజిక నిబంధనలతోనే సైన్యంలో మహిళలకు శాశ్వత కమిషన్​ ఇవ్వలేకపోతున్నామన్న కేంద్రం వాదనలను తోసిపుచ్చింది సుప్రీం.