సాయి జన్మస్థలం వివాదం మరింత ముదురుతోంది. పాథ్రీని సాయి జన్మభూమిగా పేర్కొనడాన్ని వ్యతిరేకిస్తూ ఇవాళ బంద్ పాటించాలని నిర్ణయించారు శిరిడీ వాసులు. చరిత్రలో మొదటిసారి శిరిడీ మూతపడనుంది. బంద్కు స్థానిక ఎమ్మెల్యే రాధాకృష్ణ విఖే పాటిల్ మద్దతిచ్చారు. అయితే.. ఆలయం మాత్రమే తెరిచే ఉంటుందని స్పష్టం చేశారు సంస్థాన్ ట్రస్ట్ నిర్వాహకులు.
శిరిడీకి నిత్యం వేలాది మంది సందర్శకులు వస్తుంటారు. బంద్ నిర్ణయం.. భక్తులు, పర్యటకులపై భారీ ప్రభావం చూపనుంది. మరోవైపు ఆదివారం నుంచి పాథ్రీలోనూ బంద్ పాటిస్తున్నట్లు ప్రకటన విడుదల చేసింది పాథ్రీ కృతి సమితి.
ఇదీ వివాదం...
మహారాష్ట్ర పర్భాణీ జిల్లా పాథ్రీలోని సాయి జన్మస్థానంలో వసతుల కల్పనకు రూ. 100 కోట్లు కేటాయిస్తున్నట్లు ముఖ్యమంత్రి ఉద్ధవ్ ఠాక్రే ఇటీవల ప్రకటించగా వివాదం చెలరేగింది. ఈ నిర్ణయంపై శిరిడీ వాసులు ఆగ్రహం వ్యక్తం చేశారు. పాథ్రీ సాయి జన్మస్థలమని చెప్పేందుకు ఆధారాల్లేవని అభ్యంతరం వ్యక్తం చేస్తున్నారు.
ఈ నేపథ్యంలో సాయి జన్మభూమి వివాదం సద్దుమణిగే దిశగా ప్రయత్నాలు చేయనున్నట్లు తెలిపారు మహారాష్ట్ర సీఎం ఉద్ధవ్ ఠాక్రే. సంబంధిత పార్టీలతో రాష్ట్ర సచివాలయంలో సీఎం త్వరలోనే సమావేశం కానున్నట్లు అధికారిక ప్రకటన విడుదల చేసింది ముఖ్యమంత్రి కార్యాలయం.
