శవాలతో విద్యార్థుల ఆందోళన.. అక్కడేం జరిగింది?

ఒడిశా నబరంగ్​పుర్​ జిల్లాకు చెందిన ఆదర్శ విద్యాలయ్​ పాఠశాల విద్యార్థులు.. రోడ్డు ప్రమాదాలపై వినూత్న రీతిలో నిరసన తెలిపారు. రోడ్డు ప్రమాదాల్లో పరిస్థితులను కళ్లకు కట్టినట్టు చూపిస్తూ.. రహదారులను వెంటనే బాగు చేయాలని డిమాండ్​ చేశారు.

దేశంలో నిత్యం రోడ్డు ప్రమాదాలు జరుగుతూనే ఉంటున్నాయి. వీటిల్లో అస్తవ్యస్తంగా ఉన్న రోడ్ల వల్ల అనేక మంది ప్రాణాలు కోల్పోతున్నారు. ఈ పరిస్థితులపై ఒడిశా విద్యార్థులు వినూత్న రీతిలో నిరసన తెలిపారు.

రోడ్డుపై మృతదేహాలు...

ఒడిశా నబరంగ్​పుర్​ జిల్లాలో రోడ్లు అత్యంత దారుణ పరిస్థితుల్లో ఉన్నాయి. ముఖ్యంగా జిల్లాలోని ఉమర్​కోట్​ నుంచి రాయ్​గఢ్​.. అక్కడి నుంచి ఒడిశా సరిహద్దు ప్రాంతానికి వెళ్లే రోడ్లు మరీ అస్తవ్యస్తంగా ఉన్నాయి. దీని వల్ల అనేక మరణాలు సంభవిస్తున్నాయి. వీటికి నిరసనగా ఆదర్శ విద్యాలయ్​ పాఠశాల విద్యార్థులు.. రోడ్డుపై ఓ నాటికను ప్రదర్శించారు.

ఈ డ్రామాలో.. రక్తపు మడుగులో కొంతమంది విద్యార్థులు రోడ్డుపై పడి ఉన్నారు. పెద్దపెద్ద గాయాలతో వీరు అచేతన స్థితిలో ఉండగా.. మరికొందరు ప్లకార్డులు పట్టుకుని నినాదాలు చేశారు. రోడ్డు ప్రమాదాలను అశ్రద్ధ చేయవద్దని.. రహదారులకు మరమ్మత్తు చేయాలని డిమాండ్​ చేశారు.

ఇదీ చూడండి:- 'అల్లుడు గారూ... గాడిదపై ఎక్కండి మర్యాదలు చేస్తాం!'