కరోనా సంక్షోభం కారణంగా సొంత ప్రాంతాలకు తిరిగొచ్చిన 6 రాష్ట్రాల్లోని వలస కార్మికులకు 160 రైల్వే ప్రాజెక్టుల ద్వారా ఉపాధి లభిస్తుందని రైల్వే బోర్డు ఛైర్మన్ వినోద్ కుమార్ యాదవ్ వెల్లడించారు. రైల్వేలో మౌలిక వసతుల అభివృద్ధి కోసం చేపట్టబోయే ఈ ప్రాజెక్టులతో ఇటీవలే ప్రారంభమమైన 'గరీబ్ కల్యాణ్ రోజ్గార్ అభియాన్' కార్యక్రమం ద్వారా 6 రాష్ట్రాల్లోని 116 జిల్లాల్లో వలస కార్మికులకు ప్రయోజనం చేకూరుతుందని తెలిపారు. శుక్రవారం నిర్వహించిన వీడియో కాన్ఫరెన్స్లో ఇందుకు సంబంధించిన వివరాలు పేర్కొన్నారు.
" బిహార్, ఉత్తర్ప్రదేశ్, మధ్యప్రదేశ్, రాజస్థాన్, ఒడిశా, ఝార్ఖండ్ వ్యాప్తంగా 116 జిల్లాల్లో సొంత ప్రాంతాలకు తిరిగొచ్చిన వలస కార్మికులు, గ్రామీణ ప్రాంతాల ప్రజలకు 160 రైల్వే ప్రాజెక్టుల ద్వారా ఉపాధి లభిస్తుంది. మౌలిక వసతుల కల్పన కోసం చేపట్టిన ఈ ప్రాజెక్టుల పనులకు 8వేల 828మంది కార్మికులు అవసరం. జూన్ 20న పనులు ప్రారంభమయ్యాయి. 125 రోజులపాటు కార్మికులు ఉపాధి పొందుతారు. ఈ ప్రాజెక్టుల విలువ రూ.1888 కోట్లు "
-వినోద్ కుమార్ యాదవ్, రైల్వే బోర్డు ఛైర్మన్.
కరోనా కష్టకాలంలో అత్యవసరమైన వైద్యపరికరాలు, ఔషధాలు, ఆహార సరఫరా కోసం రైల్వే శాఖ ప్రత్యేక సేవలను ఎలాంటి ఆటంకం లేకుండా కొనసాగిస్తోందని తెలిపారు వినోద్. కొవిడ్ రోగులకు చికిత్స కోసం 5231 రైల్వే బోగీలను ఐసోలేషన్ వార్డులుగా మార్చినట్లు వివరించారు. వలస కార్మికుల కోసం జాన్ 25 నాటికి 4594 శ్రామిక్ రైళ్లను నడిపినట్లు పేర్కొన్నారు. మొత్తం 62.8 లక్షల మంది వీటిలో ప్రయాణించినట్లు చెప్పారు.
