కాంగ్రెస్ ప్రధాన కార్యదర్శి ప్రియాంక గాంధీ వాట్సాప్ ఖాతా హ్యాకింగ్కు గురైంది. ఈ మేరకు వాట్సాప్ నుంచి సంక్షిప్త సందేశం అందినట్లు కాంగ్రెస్ అధికార ప్రతినిధి రణ్దీప్ సింగ్ సుర్జేవాలా వెల్లడించారు. హ్యాకింగ్కు గురైన ఖాతాదారుల ఫోన్లకు సందేశాలు పంపుతున్న క్రమంలో.. ప్రియాంక గాంధీకి ఈ సందేశం వచ్చినట్లు పేర్కొన్నారు.
ఇజ్రాయెల్కు చెందిన స్పైవేర్ పెగసస్.. భారతీయ పాత్రికేయులు, మానవహక్కుల కార్యకర్తలే లక్ష్యంగా సమాచార చోరీకి పాల్పడినట్లు వాట్సాప్ గత గురువారం ప్రకటించింది. ఈ నేపథ్యంలో ప్రియాంక గాంధీ ఖాతా హ్యాకింగ్కు గురుకావటం ప్రాధాన్యం సంతరించుకుంది.
భాజపాపై విమర్శలు..
స్పైవేర్ పెగసస్ ద్వారా మొబైల్ ఫోన్లను అక్రమంగా, రాజ్యాంగ విరుద్ధంగా హ్యాకింగ్ చేయటంలో భాజపా ప్రభుత్వ కుట్ర ప్రతిరోజూ తేటతెల్లమవుతోందని విమర్శించారు సుర్జేవాలా. ఈ అక్రమ స్పైవేర్ రాకెట్ను భాజపా ప్రభుత్వమే అమలు చేస్తోందన్నారు. వ్యక్తిగత గోప్యత హక్కు అనేది మోదీ ప్రభుత్వానికి హాస్యంగా మారిందని విమర్శిస్తూ ట్వీట్ చేశారు.
ఇదీ చూడండి: వాట్సాప్ డేటాను చోరీ చేసిన ఇజ్రాయెల్ స్పైవేర్!
