మీ ఇష్టం వచ్చిన పార్టీలో చేరండి: రజనీ

సూపర్​ స్టార్​ రాజకీయ రంగ ప్రవేశంపై నిరాశ చెందిన అభిమాన సంఘం నేతలు వేరే పార్టీలో చేరుతున్న నేపథ్యంలో రజనీ మక్కల్​ మండ్రం ఓ కీలక ప్రకటన చేసింది. అభిమానులు వారి ఇష్టాలకు అనుగుణంగా ఏ పార్టీలో అయినా చేరవచ్చని తెలిపింది.

సూపర్‌స్టార్‌ రజనీకాంత్‌ రాజకీయాల్లోకి రానని తేల్చి చెప్పినందున... ఆయన అభిమాన సంఘం నేతలు వారికి ఇష్టం వచ్చిన పార్టీలో చేరవచ్చని రజనీ మక్కల్​ మండ్రం(ఆర్​ఎంఎం) తెలిపింది. వేరే పార్టీతో కలిసి పనిచేసినా వారు ఎప్పటికీ తలైవా అభిమానులుగానే ఉంటారని పేర్కొంది. ఈమేరకు ఆర్​ఎంఎం నాయకుడు వి.ఎం సుధాకర్​ ఓ ప్రకటన విడుదల చేశారు.

రజనీ మక్కల్​ మండ్రం విడుదల చేసిన ప్రకటన

రాజకీయం రంగ ప్రవేశంపై సూపర్​ స్టార్​ వెనక్కి తగ్గడంపై నిరాశ చెందిన ముగ్గురు ఆర్​ఎంఎం జిల్లా కార్యదర్శలు డీఎంకే అధ్యక్షుడు ఎంకే స్టాలిన్ ఆధ్వర్యంలో ఈ ఆదివారం పార్టీ తీర్థం పుచ్చుకున్నారు. ఈ నేపథ్యంలో అభిమాన సంఘం చేసిన ప్రకటన ప్రాధాన్యం సంతరించుకుంది.

తమిళనాడు శాసన సభ ఎన్నికల్లో 234 సీట్లలోనూ పోటీ చేస్తామని రజనీ తొలుత ప్రకటించారు. అయితే అనారోగ్య పరిస్థితుల కారణంగా ఇప్పట్లో రాజకీయ పార్టీని ప్రకటించడం లేదని ఇటీవలే స్పష్టం చేశారు.