జాతీయ సమస్యలపై కాంగ్రెస్ అగ్రనేతలు రాహుల్ గాంధీ, ప్రియాంక గాంధీ దూకుడుగా స్పందిస్తున్నారని ఆ పార్టీ సీనియర్ నేత దిగ్విజయ్ సింగ్ అన్నారు. అయితే వీరి ప్రయత్నాన్ని మెచ్చుకోనివారు ఇంకా పార్టీలో ఎందుకు ఉన్నారని ప్రశ్నించారు.
"మోదీ- షా ద్వయాన్ని ఎదుర్కొనే సత్తా రాహుల్- ప్రియాంకలకు ఉంది. దర్యాప్తు సంస్థలతో గాంధీ- నెహ్రూ కుటుంబాన్ని ఇబ్బంది పెట్టినా వారికి తట్టుకునే శక్తి ఉంది. జాతీయ సమస్యలపై రాహుల్, ప్రియాంక దూకుడుగా వ్యవహరించటాన్ని నేను వ్యక్తిగతంగా సమర్థిస్తున్నా. ఈ విషయాన్ని కొంతమంది కాంగ్రెస్ నేతలు అంగీకరించటం లేదు. వాళ్లు ఇంకా కాంగ్రెస్లో ఎందుకు ఉన్నట్లు?"
- దిగ్విజయ్ సింగ్
రాహుల్ను వ్యతిరేకించేవారు లేరు..
2019 సార్వత్రిక ఎన్నికల్లో ప్రధాని మోదీ ప్రధాన ప్రత్యర్థిగా రాహుల్ దీటుగా నిలబడ్డారని దిగ్విజయ్ సింగ్ అన్నారు. అదే ఉత్సాహంతో ఏఐసీసీ లేదా పార్లమెంటులో కాంగ్రెస్ సభాపక్ష నేతగా ఉండి పార్టీని ముందుకు నడిపించి ఉండాల్సిందని అభిప్రాయపడ్డారు. కానీ ఎందుకు స్వచ్ఛందంగా వైదొలిగారో అర్థం కావటం లేదన్నారు.
కాంగ్రెస్లో రాహుల్ను వ్యతిరేకించేవారు ఎవరూ లేరని దిగ్విజయ్ స్పష్టం చేశారు. మీడియాలో వస్తోన్న వార్తలు కొంతమంది భావన మాత్రమేనని కొట్టిపారేశారు.
ఇదీ చూడండి: 'ఆ విషయంలో మోదీ ఎందుకు భయపడుతున్నారు?'
