భారతీయులమని మోదీ-షాకు చాటి చెప్పండి: రాహుల్

రాజ్​ఘాట్​లో నేడు కాంగ్రెస్ చేపట్టే నిరసన ర్యాలీకి విద్యార్థులు, యువత హాజరుకావాలని ఆ పార్టీ నేత రాహుల్ గాంధీ పిలుపిచ్చారు. మోదీ-షా ద్వయం పెంచుతున్న ద్వేషానికి వ్యతిరేకంగా పోరాడాలని కోరారు.

పౌరసత్వ చట్ట సవరణను వ్యతిరేకిస్తూ ప్రతిపక్ష కాంగ్రెస్‌ పార్టీ.. దిల్లీలోని రాజ్‌ఘాట్ వద్ద ఇవాళ ఆందోళన చేపట్టనుంది. ఈ కార్యక్రమంలో తనతో కలిసి పాల్గొనాలంటూ విద్యార్థులు, యువతకు పిలుపిచ్చారు కాంగ్రెస్ అగ్రనేత రాహుల్ గాంధీ.

రాహుల్ ట్వీట్లు

"ప్రియమైన ఈ దేశ విద్యార్థులు, యువతకు..

మన భవిష్యత్తును మోదీ, షా నాశనం చేశారు. నిరుద్యోగం, ఆర్థిక సంక్షోభాన్ని తెచ్చారు. అందుకే భారత్​ను విడగొట్టి ద్వేషాన్ని నింపుతున్నారు. వాళ్లను ఓడించాలంటే ప్రతి భారతీయుడికీ ప్రేమను పంచాలి.

దేశానికి విద్యార్థులే భవిష్యత్తు. మీరే మోదీ, షాలను అడ్డుకోవాలి. కలిసి వారు పంచుతున్న ద్వేషానికి వ్యతిరేకంగా పోరాడుదాం. మనం భారతీయులమని చెప్పుకుంటే సరిపోదు. ఆ విషయాన్ని చాటిచెపాల్సిన పరిస్థితి వచ్చింది. ఈ రోజు మధ్యాహ్నం 3 గంటలకు రాజ్​ఘాట్​లో మాతో కలవండి. ద్వేషం, హింసకు వ్యతిరేకంగా నిరసన తెలుపుదాం."

-రాహుల్ గాంధీ, కాంగ్రెస్ అగ్రనేత

రాజ్యాంగాన్ని పరిరక్షించేందుకు రాజ్​ఘాట్​కు తరలిరావాలని దేశ ప్రజలకు పిలుపిచ్చారు కాంగ్రెస్ ప్రధాన కార్యదర్శి ప్రియాంక గాంధీ. ఈ ఆందోళనలో రాహుల్‌తో పాటు కాంగ్రెస్‌ అధ్యక్షురాలు సోనియాగాంధీ, పార్టీ ఇతర సీనియర్‌ నేతలు పాల్గొననున్నారు.

ఇదీ చూడండి: జన స్థిరీకరణకు మేలిమి వ్యూహం