కేంద్ర ప్రభుత్వం ఇటీవల కొనుగోలు చేసిన వీవీఐపీ బోయింగ్ విమానాల కొనుగోలుపై మండిపడ్డారు కాంగ్రెస్ అగ్రనేత రాహుల్ గాంధీ. ఈ విమానాలకు అయ్యే ఖర్చుతో సియాచిన్- లద్దాఖ్ సరిహద్దులో ఉన్న సైనికులకు అనేక వస్తువులు కొనుగోలు చేయవచ్చని విమర్శల దాడి చేశారు రాహుల్.
విమానాల కొనుగోలు పేరుతో ప్రధాని నరేంద్ర మోదీ.. వేల కోట్ల రూపాయలను వృథా చేస్తున్నారని ట్విట్టర్ వేదికగా ఆరోపించారు రాహుల్. ఈ సొమ్ముతో సైనికులకు పలు వస్తువులను కొనవచ్చని పేర్కొంటూ.. సంబంధిత లెక్కల్ని ట్వీట్ చేశారు.
"మోదీ తన కోసం రూ.8,400 కోట్ల విలువైన విమానం కొనుకున్నారు. ఈ సొమ్ముతో సియాచిన్-లద్దాఖ్ సరిహద్దులోని సైనికులకు ఎన్నో వస్తువులు సమకూర్చవచ్చు. అందులో వెచ్చటి దుస్తులు- రూ.30,00,000; జాకెట్, గ్లవ్స్- రూ.60,00,000; బూట్లు- రూ.67,20,000; ఆక్సిజన్ సిలిండర్- రూ.16,80,000 వంటి వాటిని కొనుగోలు చేయవచ్చు."
- రాహుల్ గాంధీ, కాంగ్రెస్ అధినేత.
ప్రధాని ఎల్లప్పుడూ తన గురించి మాత్రమే ఆలోచిస్తారని.. సైనికులను ఏమాత్రం పట్టించుకోరని విమర్శించారు రాహుల్.
ఇదీ చదవండి: 'మోదీ హయాంలో రూ.12వేల కోట్ల ఇనుప కుంభకోణం'
