భారత దేశ వృద్ధికి చోదక శక్తిగా మారే సామర్థ్యం ఈశాన్య భారతానికి ఉందని ప్రధానమంత్రి నరేంద్రమోదీ ఆశాభావం వ్యక్తం చేశారు. ప్రస్తుతం ఈశాన్యంలో పూర్తి స్థాయిలో శాంతి నెలకొందని అన్నారు.
మణిపుర్ నీటి సరఫరా ప్రాజెక్టుకు వీడియో కాన్ఫరెన్స్ ద్వారా శంకుస్థాపన చేసిన ప్రధాని... కరోనా మహమ్మారితో పాటు వరద ముంపును ఎదుర్కొంటున్న ఈశాన్య రాష్ట్రాలకు యావద్దేశం అండగా నిలబడుతుందని భరోసా ఇచ్చారు. వరద ప్రభావానికి గురైన కుటుంబాలకు సంతాపం తెలిపారు.
"మణిపుర్లో దిగ్బంధాలు చరిత్రలో కలిసిపోయాయి. అసోంలో దశాబ్దల హింస ఆగిపోయింది. త్రిపుర, మిజోరాంలో యువత హింసాత్మక మార్గాన్ని విడిచిపెట్టారు. బ్రూ-రియాంగ్ శరణార్థులు ఇప్పుడు మెరుగైన జీవితం వైపు పయనిస్తున్నారు."
-నరేంద్ర మోదీ, ప్రధానమంత్రి
దేశ సాంస్కృతిక వైవిధ్యానికి, దృఢత్వానికి ఈశాన్య భారతదేశం గొప్ప చిహ్నమని కొనియాడారు మోదీ. ఆధునిక మౌలిక సదుపాయాలు అభివృద్ధి చేస్తే ఈ ప్రాంతంలో పర్యటకం గణనీయంగా వృద్ధి చెందుతుందని అన్నారు.
"ప్రాంతాల అనుసంధానమే పురోగతికి కీలకం. ఈశాన్య భారతదేశంలో కనెక్టివిటీ పెంచడం చాలా ముఖ్యం. జీవన సౌలభ్యం కోసమే కాకుండా ఆత్మనిర్భర్ భారత్ లక్ష్యాన్ని సాధించేందుకూ కనెక్టివిటీ ఉపయోగపడుతుంది."
-నరేంద్ర మోదీ, ప్రధానమంత్రి
కరోనాను నియంత్రించేందుకు మణిపుర్ ప్రభుత్వం రాత్రింబవళ్లు పనిచేస్తోందని కితాబిచ్చారు ప్రధాని.
ప్రాజెక్టు స్వరూపం
మణిపుర్లోని 16 జిల్లాల్లో ఉన్న 2.8 లక్షల ఇళ్లతో పాటు గ్రేటర్ ఇంపాల్ పరిధిలో ఉన్న నివాసాలకు నల్లా నీరు అందించడమే లక్ష్యంగా ఈ ప్రాజెక్టు రూపకల్పన చేశారు. రూ. 3054.58 కోట్ల వ్యయంతో ఈ పనులు చేపడుతున్నారు. న్యూ డెవలప్మెంట్ బ్యాంక్ ఇచ్చిన రుణం ద్వారా నిధులు సేకరించారు.
ఇదీ చదవండి- కరోనా ఉగ్రరూపం- ఒక్కరోజే 45,720 కేసులు
