భారత ప్రతిష్ఠాత్మక అంతరిక్ష ప్రయోగం.. 'చంద్రయాన్-2'కు కౌంట్డౌన్ మొదలయ్యింది. సోమవారం తెల్లవారుజామున ప్రయోగించేందుకు ఇస్రో అన్ని ఏర్పాట్లు చేస్తోంది. ఈ సందర్భంగా శనివారం తిరుమల శ్రీవారిని దర్శించుకున్నారు ఇస్రో చైర్మన్‌ డాక్టర్ కె. శివన్ . చంద్రయాన్-2 నమూనాను శ్రీవారి పాదాల చెంత ఉంచి ప్రత్యేక పూజలు నిర్వహించారు. ఈ ప్రయోగాన్ని వీక్షించేందుకు ఆదివారం సాయంత్రం రాష్ట్రపతి రామనాథ్‌ కోవింద్‌ విచ్చేస్తున్నారని ఆయన తెలిపారు.
" సోమవారం తెల్లవారుజామున 2 గంటల 51 నిమిషాలకు శ్రీహరికోట నుంచి చంద్రయాన్-2ను ప్రయోగించనున్నాం. అందుకు ఏర్పాట్లు చకచకా సాగుతున్నాయి. ఈ ప్రయోగం కోసం జీఎస్ఎల్వీ-మార్క్-3 వాహకాన్ని వినియోగించాం. దాదాపు రెండు నెలల తర్వాత చంద్రయాన్-2 చంద్రుడిపై అడుగుపెట్టనుంది. 2008లో ప్రయోగించిన చంద్రయాన్-1 కు ఈ ప్రయోగం కొనసాగింపు లాంటింది. చంద్రుడి పుట్టుక, పరిమాణంపై పరిశోధించడమే ఈ ప్రయోగ ముఖ్య ఉద్దేశం."
- డాక్టర్ కె. శివన్, ఇస్రో ఛైర్మన్
వర్షం కారణంగా చంద్రయాన్-2 ప్రయోగానికి ఆటంకం ఏర్పడొచ్చనే అనుమానాలను శివన్ కొట్టిపారేశారు. జీఎస్ఎల్వీ మార్క్-3 వర్షాన్ని సైతం తట్టుకోగలదని స్పష్టం చేశారు. చంద్రయాన్-2 ప్రయోగానికి మొత్తం రూ.1000 కోట్లు వ్యయమైనట్లు తెలిపారు.
2021లో గగన్యాన్
మానవులను అంతరిక్షంలోకి తీసుకెళ్లే భారత ప్రాజెక్టు గగన్యాన్ గురించి విలేకర్లు ప్రశ్నించగా... 2020 డిసెంబర్, 2021 జులైలో రెండుసార్లు మానవ రహిత గగన్యాన్ను ప్రయోగిస్తామన్నారు. ఆ తర్వాత 2021 డిసెంబర్లో మనుషులను అంతరిక్షంలోకి పంపేందుకు కసరత్తులు చేస్తున్నామని శివన్ స్పష్టం చేశారు.
