'ముస్లిం మహిళల ఆవేదన మోదీకే అర్థమైంది'

ముమ్మారు తలాక్​ బిల్లుకు పార్లమెంట్​లో ఆమోదం లభించడంపై భాజపా హర్షం వ్యక్తం చేసింది. ప్రధాని మోదీ తన వాగ్దానాన్ని నిలబెట్టుకున్నారని కమల దళం నేతలు కొనియాడారు. ముస్లిం మహిళలకు న్యాయం జరిగిందన్నారు. అయితే ఈ బిల్లు ఆమోదం పొందడం చారిత్రక తప్పిదమని విపక్షాలు విమర్శించాయి.

ఎట్టకేలకు వివాదాస్పద ముమ్మారు తలాక్​ బిల్లుకు మోక్షం లభించింది. ముస్లిం మహిళల రక్షణ కోసం కేంద్ర ప్రభుత్వం తీసుకొచ్చిన ఈ బిల్లు మంగళవారం రాజ్యసభలో ఆమోదం పొందింది. ఈ అంశంపై ప్రధానమంత్రి నరేంద్ర మోదీ సహా పలువురు భాజపా నేతలు హర్షం వ్యక్తం చేశారు.

చారిత్రక తప్పిదాన్ని పార్లమెంటు సరిచేసిందని ప్రధాని మోదీ కొనియాడారు. యావత్​ భారతదేశమంతా ఈ విషయంపై ఎంతో సంతోషంగా ఉందన్నారు.

బిల్లుపై స్పందించిన కేంద్ర హోంమంత్రి అమిత్​ షా... ముమ్మారు తలాక్​ను నిషేధించి మోదీ తన వాగ్దానాన్ని నిలబెట్టుకున్నారని కొనియాడారు.

అమిత్​ షా ట్వీట్​

"ఈరోజు ప్రజాస్వామ్యంలో ఎంతో అద్భుతమైన రోజు. ముస్లిం మహిళలకు ముమ్మారు తలాక్​ నుంచి విముక్తి లభించింది. తన మాట నిలబెట్టుకున్న మోదీకి నా అభినందనలు. ఈ చారిత్రక బిల్లు ఆమోదానికి సహకరించిన ప్రతి పార్టీకి నా ధన్యవాదాలు."
--- అమిత్​ షా, కేంద్ర హోంమంత్రి.

ముస్లిం మహిళలకు మోదీ ప్రభుత్వం న్యాయం చేసిందని కేంద్ర న్యాయశాఖ మంత్రి రవిశంకర్​ ట్వీట్​ చేశారు.

రవిశంకర్​ ట్వీట్​

"ముస్లిం మహిళలకు న్యాయం చేసి... మోదీ ప్రభుత్వం తన వాగ్దానాన్ని నిలబెట్టుకుంది. ఇకపై 'తలాక్​-తలాక్​-తలాక్'​ ఉండదు."
--- రవిశంకర్​, న్యాయశాఖ మంత్రి.

ముస్లిం మహిళల ఆవేదనను మోదీ ఒక్కరే అర్థం చేసుకున్నారని కేంద్ర మంత్రి స్మృతి ఇరానీ అన్నారు. ముమ్మారు తలాక్​ బిల్లుకు ఆమోదం లభించడంపై భాజపా సీనియర్​ నేతలు సుష్మా స్వరాజ్​, అరుణ్​ జైట్లీ ప్రధాని మోదీకి అభినందనలు తెలిపారు.

స్మృతి ఇరాని ట్వీట్​

'ఇదొక చారిత్రక తప్పిదం'

ట్రిపుల్​ తలాక్​ బిల్లు ఆమోదంపై కాంగ్రెస్​ పార్టీ మండిపడింది. బిల్లుకు ఆమోదం లభించడం చారిత్రక తప్పిదమని పలువురు సీనియర్​ నేతలు అభిప్రాయపడ్డారు.

"బిల్లుకు మేము ప్రాథమికంగా మద్దతు ఇచ్చాము. ముస్లిం మహిళలకు న్యాయం జరగాలని మేమూ కోరుకున్నాము. కానీ రెండు- మూడు అంశాలపై మాకు అభ్యంతరం ఉంది. ముమ్మారు తలాక్​ను సుప్రీంకోర్టు కొట్టిపారేసింది. కేంద్రం దీన్ని న్యాయపరంగా కొట్టివేసింది. ఇంక దీన్ని నేరంగా పరిగణించాల్సిన అవసరం ఏం ఉంది?"
--- అభిషేక్​ సింఘ్వీ, కాంగ్రెస్​ సీనియర్​ నేత.

రాజ్యసభలో ముమ్మారు తలాక్​ బిల్లు చర్చకు 41 మంది ఎంపీలు గైర్హాజరయ్యారు. సభకు గైర్హాజరైన వారి ప్రవర్తనను కాంగ్రెస్​ నేత కపిల్​ సిబాల్​ తప్పుపట్టారు.

"గైర్హాజరైన వారు తమను తాము ప్రశ్నించుకోవాలి. ఓటింగ్​ సమయంలో సభకు రాకపోతే... మరి బిల్లును వ్యతిరేకిస్తున్నామని వ్యాఖ్యలు చేయడం ఎందుకు?"
--- కపిల్​ సిబాల్​, కాంగ్రెస్​ నేత.

మంగళవారం రాజ్యసభలో ముమ్మారు తలాక్​ బిల్లుకు ఓటింగ్​లో అనుకూలంగా 99, వ్యతిరేకంగా 84 ఓట్లు వచ్చాయి. బిల్లు మొదట మూజువాణి ఓటుతో ఆమోదం పొందినా... విపక్షాలు డివిజన్‌ కోరిన కారణంగా ఓటింగ్ నిర్వహించారు.

ఇదీ చూడండి:- హాంగ్​కాంగ్​ నిరసనల వెనుక అమెరికా హస్తం: చైనా