నేడు ఉత్తర్ప్రదేశ్లో తీరిక లేకుండా గడపనున్నారు ప్రధానమంత్రి నరేంద్ర మోదీ. పలు కార్యక్రమాల్లో పాల్గొననున్న ప్రధాని.. కీలక ప్రాజెక్టులను ప్రారంభించనున్నారు. సామాజిక సాధికారత, రైతుల సంక్షేమం అంశాలపై మాట్లాడనున్నారు.
ఉదయం 11 గంటలకు ప్రయాగ్రాజ్లో 'సామాజిక్ అధికారిత శివిర్'(సామాజిక సాధికారిత శిబిరం)కు శ్రీకారం చుట్టనున్నారు. వృద్ధులు, దివ్యాంగులకు అవసరమైన ప్రత్యేక ఉపకరణాలను అందజేసేందుకు.. అక్కడి పరేడ్ గ్రౌండ్లో నిర్వహించనున్న భారీ కార్యక్రమానికి హాజరుకానున్నారు మోదీ.
ఈ సందర్భంగా ఉత్తర్ప్రదేశ్లోని ప్రయాగ్రాజ్ ఐదు అరుదైన గిన్నిస్ రికార్డులకు వేదికగా నిలవనుంది. ఒకే ప్రదేశంలో అధిక సంఖ్యలో ప్రత్యేక ఉపకరణాలు పంపిణీ, చక్రాల కుర్చీలతో అత్యంత పొడవైన వరుసను ఏర్పాటు చేయడం సహా మొత్తం 5 అంశాల్లో గిన్నిస్ రికార్డులకు ఈ కార్యక్రమం వేదికగా నిలిచే అవకాశముంది.
రాష్ట్రీయ వయోశ్రీ యోజన(ఆర్వీవై) కిందకు వచ్చే సీనియర్ సిటిజన్లు, దివ్యాంగుల కోసం నిర్వహించే అతిపెద్ద కార్యక్రమంగా దీనిని పేర్కొంటూ ట్వీట్ చేశారు ప్రధాని.
ఎఫ్పీఓల ప్రారంభం...
'ప్రధానమంత్రి కిసాన్ సమ్మాన్ నిధి' కార్యక్రమాన్ని ప్రారంభించి ఏడాది పూర్తయిన సందర్భంగా దేశవ్యాప్తంగా 10 వేల వ్యవసాయ ఉత్పత్తి సంఘాలను(ఎఫ్పీఓ) నేడు ప్రారంభించనున్నారు ప్రధాని. దేశవ్యాప్తంగా ఉన్న చిన్న, సన్నకారు, భూమిలేని రైతులకు ఈ ఎఫ్పీఓ పథకం ఉపయోగపడుతుందన్నారు.
మధ్యాహ్నం... బుందేల్ఖండ్ ఎక్స్ప్రెస్వేకు మోదీ శంకుస్థాపన చేయనున్నారు. దేశ రాజధానిని అనుసంధానం చేసే ఈ మార్గంతో బుందేల్ఖండ్ చుట్టుపక్కల ప్రాంతాల అభివృద్ధి జరుగుతుందని ఆకాంక్షించారు మోదీ. ముఖ్యంగా చిత్రకూట్, బాంద్రా, మాహోబా, హమిర్ పుర్, జాలౌన్, ఇటావా స్థానికులకు ఎంతో ప్రయోజనం చేకూరుతుందని ట్వీట్ చేశారు.
