దృఢ నిర్ణయాలు తీసుకోవటంలో ప్రధానమంత్రి నరేంద్రమోదీకి సరితూగే నాయకుడు లేడని కేంద్ర రైల్వే, బొగ్గు శాఖ మంత్రి పీయూష్ గోయల్ ఉద్ఘాటించారు. మోదీ పాలనలో దేశం అన్ని రంగాల్లో ప్రగతి పథంలోకి దూసుకెళ్లిందని పేర్కొన్నారు. లోక్సభ ఎన్నికల్లో 300పైగా స్థానాల్లో భాజపా గెలుస్తుందని తెలిపారు. ఎన్డీఏ కూటమి 367కు మించి సీట్లు పొందుతుందని 'ఈనాడు' ముఖాముఖిలో ధీమా వ్యక్తం చేశారు.
సార్వత్రిక ఎన్నికల్లో ఏ అంశాలు ప్రభావితం చేయబోతున్నాయి?
మన దేశ జనాభా 130 కోట్లు. కుల-మత వివక్ష లేకుండా అభివృద్ధి జరగాలి. వెనుకబడిన రాష్ట్రాలకు అభివృద్ధి ఫలాలు అందాలి. దేశ సమైక్యతను కాపాడే, దృఢమైన నిర్ణయాలు తీసుకోగలిగే నేతను ప్రజలు కోరుకుంటున్నారు. ఇది మోదీతోనే సాధ్యం.
పార్టీ కురువృద్ధుడు అడ్వాణీతో పాటు దత్తాత్రేయ వంటి సీనియర్లను పక్కన పెట్టారన్న విమర్శలపై ఏమంటారు?
సీనియర్‌ నేతలను భాజపా విస్మరించలేదు. మేము వారిని ఎంతో గౌరవిస్తాం. ప్రభుత్వానికి, పార్టీకి వారి సహాయ సహకారాలు ఎప్పటికీ ఉంటాయి. నా తల్లి ముంబయి నుంచి మూడుసార్లు ఎమ్మెల్యేగా గెలిచారు. 65 ఏళ్లకు రాజకీయాల నుంచి ఆమె తప్పుకున్నారు.
మెరుపుదాడులపై కేంద్ర ప్రభుత్వం ఎదుర్కొంటున్న విమర్శలపై మీ స్పందన?
మెరుపు దాడులపై కాంగ్రెస్ నేత శ్యామ్ పిట్రోడా చేసిన విమర్శలు చాలా హాస్యాస్పదం. వారికి జ్ఞాపక శక్తి తక్కువ అనుకుంటా. 2008లో ముంబై ఉగ్రదాడులపై అప్పటి ప్రభుత్వం గట్టిగా స్పందించి ఉండాల్సింది. కాంగ్రెస్ హయాంలో ఉగ్రవాదంపై సరైన చర్యలు తీసుకోలేదు. అలా చేసుంటే దేశంలో తీవ్రవాద సమస్య ఉండేది కాదు.
ఉగ్రవాది మసూద్ అజార్‌ను అప్పటి ఎన్డీఏ ప్రభుత్వమే విడుదల చేసిందంటున్నారు?
కాందహార్ విమానం హైజాక్ సమయంలో ఏర్పాటు చేసిన అఖిలపక్ష సమావేశంలో కాంగ్రెస్ కూడా ఉంది. ప్రభుత్వ నిర్ణయానికి కట్టుబడి ఉంటామని కాంగ్రెస్ స్పష్టం చేసింది. చెరలో ఉన్న 161 మంది బందీలపై అందరితో చర్చించే మసూద్ విడుదలకు నిర్ణయం తీసుకున్నాం. 2010లో కేంద్రం, కశ్మీర్లోనూ కాంగ్రెస్ అధికారంలో ఉంది. పాక్తో స్నేహపూర్వక ఒప్పందంలో భాగంగా 25 మంది ఉగ్రవాదుల్ని విడుదల చేశారు. అందులో కొందరు భారత్లో జరిగిన దాడుల్లో పాల్గొన్నారు.
ఇదీ చూడండి:'ఎందుకు పోటీ చేయట్లేదో అడ్వాణీయే చెప్పాలి'
