సెప్టెంబర్​ మొదటివారంలో పార్లమెంటు సమావేశాలు!

పార్లమెంటు వర్షాకాల సమావేశాలను సెప్టెంబర్ మొదటివారంలో నిర్వహించేందుకు ప్రభుత్వం ఏర్పాట్లు చేస్తోంది. కరోనా నేపథ్యంలో భౌతిక దూరం నిబంధనలతో కొత్త సిట్టింగ్ ప్లాన్​ను రూపొందిస్తున్నట్లు తెలుస్తోంది. రెండు సభలు ఒకేసారి కాకుండా ఉదయం, మధ్యాహ్నం వేళల్లో వేర్వేరుగా నిర్వహించనున్నట్లు సమాచారం.

పార్లమెంటు వర్షాకాల సమావేశాలు సెప్టెంబర్ మొదటివారంలో ప్రారంభమయ్యే అవకాశం ఉందని అధికారిక వర్గాలు తెలిపాయి. కరోనా నేపథ్యంలో భౌతిక దూరం పాటించటం కోసం రెండు ఛాంబర్లలో ఒకే సభను నిర్వహించాలని అధికారులు భావిస్తున్నట్లు సమాచారం.

ఈ మేరకు లోక్​సభ, రాజ్యసభ ఛాంబర్లను పరిశీలించిన పార్లమెంటరీ వ్యవహారాల శాఖ మంత్రి ప్రహ్లాద్ జోషి.. సమావేశాల సన్నాహాలను సమీక్షించారు. కరోనా నేపథ్యంలో చేయాల్సిన మార్పులపై సూచనలు చేశారు. భౌతిక దూరం పాటించటం కోసం కొత్త సిట్టింగ్ ప్లాన్​ను రూపొందించినట్లు తెలుస్తోంది. ఇందుకు సంబంధించిన పనులు ముమ్మరంగా సాగుతున్నట్లు సమాచారం.

గ్యాలరీల్లోనూ..

రెండు ఛాంబర్లతో పాటు గ్యాలరీల్లోనూ ఎంపీలు కూర్చుంటారని రాజ్యసభ సచివాలయం వెల్లడించింది. దీని ప్రకారం.. రాజ్యసభ సభ్యులు ఛాంబర్​లో 60 మంది, గ్యాలరీలో 51 మంది, లోక్​సభ ఛాంబర్​లో 132 మంది కూర్చునే విధంగా ఏర్పాట్లు చేయనున్నారు.

లోక్​సభ సమావేశాలకూ ఇదే విధంగా ప్రణాళికలు వేసినట్లు తెలుస్తోంది. అయితే రెండు సభలు ఒకేసారి కాకుండా ఉదయం, మధ్యాహ్నం వేళల్లో వేర్వేరుగా నిర్వహించనున్నారు. 1952 తర్వాత ఇలా జరగటం ఇదే తొలిసారి.

ఇదీ చూడండి: పార్లమెంట్‌ అనెక్స్‌ భవనంలో చెలరేగిన మంటలు