దిల్లీలో సాగు చట్టాలకు వ్యతిరేకంగా భారీ స్థాయిలో నిరసనలు జరుగుతున్న సమయంలో పార్లమెంట్ బడ్జెట్ సమావేశాలు ప్రారంభం కానున్నాయి. నూతన వ్యవసాయ చట్టాలను రద్దు చేయాలన్న విపక్షాల డిమాండ్తో.. సమావేశాలు సజావుగా సాగుతాయా లేదా అన్నది ప్రశ్నార్థకంగా మారింది.
ఇప్పటికే జారీ చేసిన వివిధ ఆర్డినెన్స్లను చట్టాలుగా మార్చేందుకు.. సంబంధిత బిల్లులను ఇరు సభల ముందుకు తీసుకురానుంది కేంద్రం.
విపక్షాలు లేకుండానే..
ఉభయసభలను ఉద్దేశించి రాష్ట్రపతి రామ్నాథ్ కోవింద్ చేసే ప్రసంగంతో బడ్జెట్ సమావేశాలు ప్రారంభమవుతాయి. అనంతరం ఆర్థిక సర్వేను సభ ముందు ఉంచనుంది ప్రభుత్వం. ఫిబ్రవరి 1న బడ్జెట్ ప్రవేశపెట్టనుంది.
అయితే, సాగుచట్టాలపై పోరాటం చేస్తున్న అన్నదాతలకు సంఘీభావంగా రాష్ట్రపతి ప్రసంగాన్ని బహిష్కరిస్తున్నట్టు 16 విపక్ష పార్టీలు ప్రకటించాయి. గణతంత్ర దినోత్సవం నాడు జరిగిన హింసాకాండపై విచారణ జరిపించాలని డిమాండ్ చేశాయి.
కాగా, బహిష్కరణపై పునరాలోచించుకోవాలని విపక్షాలను కేంద్రం కోరింది. రాష్ట్రపతి ప్రసంగాన్ని బహిష్కరించడం మంచి పరిణామం కాదని పేర్కొంది. సమావేశాల తొలి భాగంలో బిల్లులు తీసుకురావట్లేదని ప్రభుత్వం స్పష్టం చేసింది. బడ్జెట్ ప్రవేశపెట్టిన వెంటనే ధన్యవాదాల తీర్మానంపై చర్చ ఉంటుందని తెలిపింది. బడ్జెట్ సమావేశాల్లో 4 ఆర్డినెన్స్లను ఆమోదించేందుకు సిద్ధమైంది.
కొవిడ్ నిబంధనలు
గత పార్లమెంట్ సమావేశాల తరహాలోనే ఈసారి కూడా సభలను నిర్వహిస్తున్నారు. ఉదయం రాజ్యసభ, సాయంత్రం లోక్సభ సమావేశాలు జరుగుతాయి.
కరోనా కారణంగా పార్లమెంట్ శీతాకాల సమావేశాలు రద్దు అయ్యాయి. అంతకుముందు సెప్టెంబర్లో జరిగిన సమావేశాల్లో.. శని, ఆదివారాల్లోనూ పార్లమెంట్ కార్యకలాపాలు సాగించాయి. ఈసారి మాత్రం ఆయా రోజుల్లో సభలు ఉండవు.
పార్లమెంట్ బడ్జెట్ సమావేశాలను రెండు భాగాలుగా విభజించింది కేంద్రం. శుక్రవారం మొదలయ్యే సమావేశాలు వచ్చే నెల 15తో ముగుస్తాయి. అనంతరం పార్లమెంట్ మార్చి 8న తిరిగి సమావేశమవుతుంది.
కాగితరహితంగా
కరోనా నేపథ్యంలో కాగిత ప్రతులు లేకుండానే బడ్జెట్ను ప్రవేశపెట్టాలని కేంద్రం నిర్ణయించింది. అందువల్ల.. సభ ముందుకు బడ్జెట్ ప్రతులు, ఆర్థిక సర్వే డాక్యుమెంట్లు వచ్చిన అనంతరం.. వాటిని ఆన్లైన్లో అందుబాటులో ఉంచనున్నారు.
'గేమ్ఛేంజర్'
కరోనా సంక్షోభం వేళ.. ఫిబ్రవరి 1న ప్రవేశపెట్టనున్న బడ్జెట్ను గేమ్ఛేంజర్గా అభివర్ణించింది అధికార భాజపా. దేశ ఆర్థిక వృద్ధికి సంబంధించి ఆ రోజున ఒక కొత్త శకం మొదలవుతుందని పేర్కొంది.
కాంగ్రెస్ మాట...
2020-21 బడ్జెట్లోని సవరించిన అంచనాలనే కేంద్ర ఆర్థికమంత్రి నిర్మలా సీతారామన్ తిరిగి ప్రవేశపెడతారనే భయం తమలో ఉందని కాంగ్రెస్ పేర్కొంది. ఏడేళ్ల భాజపా పాలనలో దేశ ఆర్థిక వ్యవస్థ నాశనమైందని ఆరోపించింది.
