ఇద్దరు భార్యలకు ఆస్తి పంపకం విషయంలో బొంబాయి హైకోర్టు కీలక వ్యాఖ్యలు చేసింది. ఇద్దరు భార్యలు ఉంటే.. చట్టం ప్రకారం భర్తకు చెందిన సొమ్మును పొందేందుకు మొదటి భార్యకు మాత్రమే అర్హత ఉంటుందని పేర్కొంది. అయితే.. ఇరువురికి పిల్లలుంటే వారందరికీ ఆ డబ్బును తీసుకునేందుకు హక్కు ఉంటుందని స్పష్టం చేసింది.
రైల్వే పోలీసుకు అందే పరిహారానికి సంబంధించిన కేసులో ఈ మేరకు వ్యాఖ్యానించింది జస్టిస్ ఎస్జే కథవల్లా నేతృత్వంలోని ధర్మాసనం.
కొవిడ్-19 పరిహారంతో..
మే 30న కరోనాతో మహారాష్ట్ర రైల్వే భద్రతా దళంలో ఏఎస్ఐగా పనిచేస్తోన్న సురేశ్ హటాంకర్ ప్రాణాలు కోల్పోయారు. విధుల్లో ఉండి కరోనా కారణంగా మరణించిన పోలీసులకు రూ.65 లక్షల పరిహారం ప్రకటించింది మహారాష్ట్ర ప్రభుత్వం. ఈ పరిహారం తమకే ఇవ్వాలని హటాంకర్ ఇద్దరు భార్యలు ప్రభుత్వానికి విడివిడిగా విన్నవించారు.
ఆ తర్వాత రెండో భార్య కుమార్తె శ్రద్ధ హైకోర్టును ఆశ్రయించారు. నిరాశ్రయులైన తనను, తన తల్లిని కాపాడేందుకు పరిహారంలో సరైన వాటా ఇవ్వాలని కోరారు.
హటాంకర్ అంశం కోర్టుకు చేరిన నేపథ్యంలో రాష్ట్రప్రభుత్వం కీలక నిర్ణయం తీసుకుంది. పరిహారం ఎవరికి ఇవ్వాలని కోర్టే నిర్ణయించాలని కోరుతూ.. సంబంధిత నగదును న్యాయస్థానానికే అందిస్తామని ధర్మాసనానికి తెలిపింది. ఇద్దరు భార్యల విషయంలో గతంలో ఔరంగాబాద్ బెంచ్ ఇచ్చిన తీర్పును గుర్తుచేసింది.
హటాంకర్ మొదటి భార్య శుభద, ఆమె కుమార్తె సురభి వీడియో కాన్ఫరెన్స్ ద్వారా కోర్టుకు హాజరయ్యారు. ఈ సందర్భంగా తన భర్తకు మరో భార్య, కూతురు ఉన్నట్లు తమకు తెలియదని తెలిపారు. అయితే.. వారికి పూర్తి వివరాలు తెలుసునని వాదించారు శ్రద్ధ తరఫు న్యాయవాది. గతంలో ఫేస్బుక్లో ఇరువురు భార్యలు మాట్లాడుకున్నట్లు చెప్పారు. హటాంకర్ రెండో భార్యతోనే ఉండేవారని, వారి కుమార్తె ధారావిలోని రైల్వే క్వార్టర్స్లోనే ఉందని తెలిపారు న్యాయవాది. హటాంకర్ తొలి వివాహం 1992లో, రెండో వివాహం 1998 సమయంలో అయ్యాయని... రెండు పెళ్లిళ్లు రిజిస్టర్ అయినట్లు చెప్పారు.
ఇరువర్గాల వాదనలు విన్న ధర్మాసనం మొదటి భార్యకు అనుకూలంగా వ్యాఖ్యలు చేసింది. అలాగే.. హటాంకర్కు రెండో భార్య ఉన్నట్లు తెలుసా లేదా అనేది గురువారంలోపు అఫిడవిట్ దాఖలు చేయాలని మొదటి భార్య, ఆమె కూతురును ఆదేశించింది.
తదుపరి విచారణను గురువారానికి వాయిదా వేసింది.
ఇదీ చూడండి: బుల్లి తెరల్లో 'బాల్యం' బందీ.. ఇదే కొనసాగితే కష్టం!
