నరేంద్రమోదీ చేపట్టిన నోట్ల రద్దుతో దేశ ఆర్థిక రంగానికి జరిగిన నష్టాన్ని... తాము అధికారంలోకి వచ్చాక అమలు చేసే కనీస ఆదాయ హామీ పూడ్చుతుందని చెప్పారు కాంగ్రెస్ అధ్యక్షుడు రాహుల్ గాంధీ. న్యాయ్(న్యూన్తమ్ ఆయ్ యోజన) ప్రకటనతో భాజపా దిక్కుతోచని స్థితిలో పడిందని పీటీఐ వార్త సంస్థకు ఇచ్చిన ముఖాముఖిలో ఎద్దేవా చేశారు.
"న్యాయ్ పథకానికి రెండు లక్ష్యాలున్నాయి. ఒకటి దేశంలో 20 శాతం ప్రజలకు నగదు ఇవ్వటం, నోట్ల రద్దు వల్ల కలిగిన నష్టాన్ని పూడ్చటం. నోట్ల రద్దు ద్వారా ప్రధాని ఆర్థిక వ్యవస్థ నుంచి నగదును తొలగించారు. గబ్బర్ సింగ్ పన్నును సరిగా అమలు చేయకపోవటం వల్ల అవ్యవస్థీకృత రంగం చాలా నష్టపోయింది"
--రాహుల్ గాంధీ, కాంగ్రెస్ అధ్యక్షుడు
ఈ పథకానికి న్యాయ్ అని పేరు పెట్టటం వెనుక ఉన్న దృక్కోణాన్ని రాహుల్ వివరించారు. మోదీ ఐదు సంవత్సరాల్లో పేదలకు దక్కాల్సిన న్యాయాన్ని లాక్కున్నారని, ఈ విషయం తెలియజేసేలా ఈ పేరు ఎంచుకున్నట్లు వివరించారు.
"రైతులు, చిన్న తరహా పారిశ్రామికవేత్తలు, నిరుద్యోగ యువతకు దక్కాల్సిన న్యాయాన్ని మోదీ లాక్కున్నారు. తల్లుల, ఆడబిడ్డల పొదుపును తగ్గేలా చేశారు. నిర్లక్ష్యానికి గురైన వారి దగ్గరి నుంచి మోదీ తీసుకున్న దాన్ని తిరిగి వారికే ఇవ్వాలనుకుంటున్నాం"
--రాహుల్ గాంధీ, కాంగ్రెస్ అధ్యక్షుడు
ఇదీ చూడండి :'నా అవసరం ఉందంటే తప్పక కలిసి పనిచేస్తా'
ముమ్మాటికీ సాధ్యమే...
న్యాయ్ పథకం వల్ల ఆర్థిక వ్యవస్థపై రూ.3.6 లక్షల కోట్ల భారం పడుతుందన్న అంచనా ఉంది. ఇది దేశ ద్రవ్య లోటుతో సమానం. అయితే ఈ అంచనాలన్నీ వాస్తవం కాదని, ఆర్థికంగా ఇది సాధ్యపడుతుందని ఉద్ఘాటించారు రాహుల్.
"పూర్తి పరిశోధనతో చాలా మంది నిపుణుల అభిప్రాయం తీసుకున్న అనంతరమే ఈ హామీ ప్రకటించాం. న్యాయ్ పథకం ఒక విప్లవాత్మక కార్యక్రమం. పేదరికంపై ఆఖరి అస్త్రం. కానీ వస్తు, సేవల పన్ను, నోట్ల రద్దులా కఠినంగా అమలు చేయబోము. నోట్ల రద్దు, జీఎస్టీల్లా నిపుణులను సంప్రదించకుండా ఎలాంటి చర్యలు తీసుకోం."
--రాహుల్ గాంధీ, కాంగ్రెస్ అధ్యక్షుడు
ఓట్ల కోసం కాదు...
న్యాయ్... ప్రజాకర్షక పథకం అనే అభిప్రాయం ఉంది. ఎన్నికల వేళ కాంగ్రెస్ ఓట్లు దండుకోవటానికి ఈ అస్త్రాన్ని ప్రయోగిస్తోందని విశ్లేషకులు అభిప్రాయపడుతున్నారు. ఈ వాదనను రాహుల్ గాంధీ ఖండించారు.
"నరేంద్రమోదీ ధనవంతులైన 15 మందికి రూ.3.5 లక్షల కోట్ల ఇచ్చినప్పుడు ప్రజాకర్షకంగా పరిగణించలేదు. కానీ పేదలకు సహాయపడే ఈ పథకాన్ని ఎందుకు ప్రజాకర్షకంగా పరిగణిస్తున్నారు? మోదీ పెట్టుబడిదారీ మిత్రులు మాత్రమే ప్రస్తుత ప్రభుత్వ పథకాల వల్ల లబ్ధిపొందుతున్నారు. న్యాయ్... పేదల కోసం ఉద్దేశించిన పథకం. ఇందులో ప్రజాకర్షకం ఏం లేదు"
--రాహుల్ గాంధీ, కాంగ్రెస్ అధ్యక్షుడు
ఈ పథకాన్ని ఏవిధంగా అమలు చేస్తారు? ఎక్కడ మొదటి అమలు చేస్తారు? ఇలాంటి ప్రశ్నలకు జవాబిచ్చే ప్రయత్నం చేశారు రాహుల్.
జీఎస్టీలా ఆదారబాదరగా అమలు చేయబోము. మొదట చిన్న పైలట్ ప్రాజెక్టు ప్రారంభిస్తాం. లోపాలు తెలుసుకున్న అనంతరం దేశవ్యాప్తంగా అమలు చేస్తాం. అర్హత ఉన్న ఏ కుటుంబం కూడా ప్రయోజనాలను కోల్పోకుండా.... లబ్ధిదారులను ఎంపిక చేయటానికి ఒక మంచి పద్ధతిని తీసుకొస్తాం.
10 సంవత్సరాల యూపీఏ హయాంలో 14 కోట్ల మంది ప్రజలను పేదరికం నుంచి బయటకు తీసుకొచ్చాం. ఇప్పుడు ఆ పనిని పూర్తి చేస్తాం. 20 నుంచి 22 శాతం కుటుంబాలు నేటికి పేదరికంలో ఉన్నాయి. ఇందులో ప్రధానమంత్రి నోట్ల రద్దు, గబ్బర్ సింగ్ పన్ను వల్ల నష్టపోయినవారే. భారతదేశం నుంచి పేదరికాన్ని తరిమికొట్టడమే మా అంతిమ లక్ష్యం."
--రాహుల్ గాంధీ, కాంగ్రెస్ అధ్యక్షుడు
ఇదీచూడండి :'శక్తి' ప్రకటనపై పరిశీలనకు ఈసీ కమిటీ
